INTEGRIDAD TA E BASE DI BON GOBERNACION



Un faro ta simbolisa fortalesa, siguridad, speransa. Un refugio sigur ora barconan for di leu wak pa prome biaha e luz brillante di e faro. Un faro ta simbolisa tambe e superacion di retonan y guía den adversidad. Pero tambe ta simbolisa e rumbo fiho pa sigui. E gobierno cu MEP a forma parti di dje desde 2017, a uza e California Lighthouse simbolisando e gobernacion cu integridad como prioridad pa brinda nos pueblo e aspectonan simbolico cu un Faro ta brinda.

Dilanti di e California Lighthouse, Lidernan di Partido MEP y RAIZ diahuebs anochi a firma un Declaracion di Intencion pa Formacion di Gobierno 2021-2025. E programanan di MEP y RAIZ ta duna espacio pa traha hunto y pa reposiciona e rumbo di nos país. Integridad ta keda un prioridad pa ambos partido.

“Awo cu nos a firma e Declaracion di Intencion pa Formacion di Gobierno 2021-2025, nos lo sigui e siguiente pasonan di negosacion y lo basa esaki riba e 6 puntonan crucial pa ambos partido menciona den e declaracion cu a wordo firma na unda cu Integridad ta aparece como e prome punto.

E Faro na Westpunt ta simbolisa Integridad pa nos. Ta p’esey tambe nos a firma e declaracion aki na e sitio aki dilanti e publico grandi cu a presenta. E lus di e Faro ta draai rond y ta luza den scuridad y bo no sa nunca ki ora e ta yega y esey ta pone cu bo tin cu cana e caminda recht tur ora, asta ora niun hende ta wak, hasta ora e luz no ta riba bo. Esey ta principio di integridad”, Lider di MEP Sra.Evelyn Wever-Croes a expresa.

Den e Declaracion di Intencion pa Formacion di Gobierno 2021-2025, ta poni e siguiente texto: Democracia di nos pais y bon gobernacion ta depende di e capacidad y integridad di esnan cu ta ocupa posicionnan clave den e aparato (semi) gubernamental. P’esey ta importante pa garantisa gobernantenan integro den gobernacion y procesonan integro den e aparato gubernamental y companianan estatal. Ta sigui eleva “integridad” na nivel ministerial dunando contenido na Bureau Integriteit, Defensor di Pueblo y Corporate Governance Code pa companianan estatal a base di un “integriteitsbeleidsplan”. Ademas ta busca ratificacion di e Convencion di Nacionnan Uni contra corupcion di 2003.

“Cu un maneho y un programa ambicioso di integridad di ambos Partido den e siguiente programa di gobernacion, nos lo trece confiansa bek di nos pueblo den e Gobierno”, Lider di MEP a enfatisa.

E dos lidernan di nan partido a entrega otro un ‘lighthouse’ simbolisando nan promesa pa goberna cu Integridad y maneha nos pais den un rumbo na unda integridad ta bira un normalidad den tur su aspecto.

11 views0 comments