IDEA TA BRINDA INFORMACION TOCANTE CAMPAÑA ‘CUMPRA LOCAL’


Oranjestad – E unidad IDEA – Iniciativa pa Desaroyo di Empresa Arubano – e unidad di Departamento di Asuntonan Economico, Comercio y Industria ta carga e campaña Cumpra Local cu Minister Xiomara Maduro a lansa diaranson ultimo den Caya G.F. Betico Croes. E Funcionario di Maneho di IDEA, sra. Louella Croes-Ras a hiba palabra y a splica tocante di e campaña Cumpra Local. E meta di e campaña ‘Cumpra Local’ ta pa conscientisa nos comunidad e importancia di cumpra productonan local y haci uso di nos servicionan di nos negoshinan local pa yuda reconstrui nos economia.


Logo di Cumpra Local

Sra. Croes a splica cu e diseño di e logo di e campaña Cumpra Local tin tres figura cu tin dos significacion, e prome significacion ta e hende cu ta nos fortalesa. Pa medio di e campaña aki, nos hendenan y henter comunidad lo bai beneficia di dje. E di dos significacion ta cu e figura ta simbolisa nos negoshinan, negoshi micro, chikito y mediano. E figuranan ta conecta cu otro cual ta tipifica e e compromiso cu cada cuidadano y comerciante tin cu Pais Aruba. E fluho ta simbolisa e placa cu ta keda circula den nos economia pa crea un economia sostenibel pa nos Pais. E logo ta consisti di cuater color, oraño, geel, blauw y shinishi. E color oraño ta nifica e determinacion di nos comerciantenan pa logra exito. E color geel ta nifica optimismo y positivismo, e pensamento positivo y actitud optimista di nos comerciantenan pa bay dilanti. E color blauw ta simbolisa e confiansa di nos hendenan y e stabilidad di e negoshi. E color shinishi ta nifica e compromiso di nos pueblo cu e comercio di nos Pais.


Campaña Cumpra Local

E campaña Cumpra Local lo concentra su publicidad riba medianan social, den corant, na radio y via television. Lo tin publicacion riba paginanan di Facebook di IDEA (Idea-Aruba), Departamento di Asuntonan Economico, Minister di Finansa, Asuntonan Economico y Cultura, Small Business Event y tambe riba e paginanan di Actioncoach y Jeremy Wever (IamJeremyWever) cu ta promove negoshinan local.


E campaña Cumpra Local a inicia cu publicacion di teaser durante cuater dia largo den corantnan y riba pagina di facebook di IDEA. Alabes nos yiu di tera internacionalmente conoci Jeon, a traha un jingle y videoclip cu e mensahe di ‘Cumpra Local’ cu lo bay ta na varios radio, television y tambe riba e paginanan di facebook ariba menciona. Jeon tambe lo promove esaki riba su pagina di facebook. Durante e siguiente dianan sra. Louella Croes lo bay duna varios entrevista na radio y television pa duna mas informacion tocante di e campaña Cumpra Local. E campaña ta consisti tambe di entrevista educativo cu ehecutivonan di departamentonan di SVB, DIMP y DEZHI pa comparti informacionan importante tocante operacion di un negoshi. Hunto cu esaki lo tin entrevista cu varios entrepeneurs cu lo duna informacion tocante di e producto y/of servicio cu nan ta ofrece y tambe nan ta splica kico nan a haci y ta haciendo pa por sobrevivi e temponan dificial aki y ofrece nan oferta na comunidad. Pa e comerciantenan cu kier participa na e campaña por tuma contacto cu sra. Louella Croes na telefon, 521 2400/521 2439 of por manda un email na L.croes@deaci.aw. Importante ta pa e negoshi ta legalmente inscribi y tin su papelnan na ordo pa por participa.


#DiNosPaNosMes

Sra. Croes a haci un apelacion na cada cuidadano cu ora bo cumpra un producto of haci uso di un servicio local, por saca un potret y post e riba bo pagina di facebook cu #cumpralocal of #DiNosPaNosMes pa asina yuda promove e campaña Cumpra Local. Ban uni forsa pa asina hunto nos por crea y sostene empleo y nos comercio. Asina nos por crea un desaroyo di un economia sostenibel pa Pais Aruba y alabes nos por yuda stimula entrepeurship pa e futuro generacion.


4 views0 comments