Hobenan di Aruba ta duna conseho na Gobierno di Aruba den cuadro di e proyecto #MyNewWorld di UNICEF


Aruba a ser enfrenta cu e prome dos casonan di Covid-19 ariba diabierna 13 di maart ultimo. Desde e dia aki hopi cos a cambia na Aruba. Banda di e cosnan bon manera, mas tempo cu famia y un naturalesa cu a hala rosea bek, e Pandemia di Covid-19 a haci hopi problema di nos pais mas visible.


Durante un rueda di prensa di minister president di Hulanda Mark Rutte, e minister a vocivera cu gobiernonan mester bai scucha e stem di e mucha y hoben mas y asina yega na solucionan sostenibel pa diferente problemanan cu nos paisnan por ta encontrado. Esaki a haci cu UNICEF Nederland a crea e proyecto #MyNewWorld. #MyNewWold ta ser implement ana Hulanda, Curacao, Bonaire, St. Maarten, St. Eustatius, Saba y Aruba. Na Aruba UNICEF Nederland a aserka Fundacion Telefon pa Hubentud Aruba pa realisa e proyecto pa nan.


Na Aruba a selecta 8 hoben di entre 14 pa 18 aña cu ta bishita scol secundario pa participa na #MyNewWorld. Ta trata di 4 cabayero y 4 dama cu ta bin di diferente districto di Aruba y for di diferente etnicidad. E hobenan participando na #MyNewWorld ta: Ariany de Weever, Daniel Jones, Giovanna Carisal, Loui-Angelo Bislick, Jean Croes, Jordan Peterson, Shaneidee Rosaria y Sherona Manuela.


Primeramente e hobenan a bin hunto ariba 17 di october pa elabora ariba e retonan cu segun nan Aruba tin. Despues ariba 24 di october e hobenan a presenta possible solucionan pa e retonan cu Aruba ta encontrando. E retonan y solucionan menciona door di e hobenan ta ser incorpora awor aki den un document di UNICEF Nederland cu mas despues lo ser presenta na gobierno di Aruba.


Banda di elabora ariba retonan di pais Aruba y possible solucionan pa esakinan, e hobenan ta siguiendo un training di debate. Den cuadro di dia nacional y internacional di Derecho di Mucha, ariba 20 di November proximo e hobenan di Aruba lo debati na un manera virtual contra hobenan di Curacao y Bonaire tocante solucionan pa e retonan di e paisnan Hulandes Caribense.


Despues di a elabora ariba retonan y solucion pa e retonan di nos pais y despues di a debati virtualmente contra hobenan di Curacao y Bonaire, e 8 hobenan di Aruba lo ser ricibi ariba 23 di november pa Minister Presidente Evelyn Wever Croes y Minister di Asuntonan Social Glenbert Croes. Durante nan encuentro cu Minister President y Minister di Asuntonan Social, e hobenan lo presenta e raport compila pa UNICEF Nederland cu ta trata e retonan y e solucionnan cu nan ta mira pa Aruba.


Fundacion Telefon pa Hubentud Aruba y UNICEF Nederland kiera a gradici Anne-Marie Proveyer-Groot y Derwin Mathilda di Ministerie van Onderwijs. Tambe un gradicimento ta bai na Colegio San Nicolas, John Wesley College, Colegio San Antonio, Mon Plaisir College, Abraham de Veer School y YNZ Montessori High School pa e coperacion.


Pa mas informacion tocante #MyNewWorld por tuma contacto cu Fundacion Telefon pa Hubentud Aruba via nos website: 131.aw, facebook: https://www.facebook.com/telefon.hubentud/, email: telhubentud@gmail.com of telefon 5886138.