Celebrando 60 aniversario di Stichting Reclassering Aruba


HISTORIA

Na aña 1961, riba dia 8 di mei pa ta exacto, ‘Stichting Reclassering en Kinderbescherming 1961’ a wordo funda. Ministerio Publico a mira e necesidad pa tin mas informacion di acusadonan, pa asina corte por tuma un decision balansa. Tambe a sinti e necesidad pa duna guia structural riba tereno di reintegracion.

Na aña 2011, a opta pa cambia e nomber di e fundacion pa ‘Stichting Reclassering en Jeugdbescherming Aruba’ pa refleha e grupo di meta cu e organisacion ta guia miho, cual ta hoben te adulto desde 12 aña di edad, segun e ley penal di Aruba.

Un persona cu a hunga un rol cardinal pa e fundacion, ta sra. Christina van den Berg-de Freitas cu a traha duro y a logra hopi riba tereno di reintegracion. Fuera di a desaroya metodonan efectivo pa e trabow y e clientenan specifico di Reclassering, Christina tabata un docente ehemplar, representante di Aruba na varios congreso internacional, miembro di un cantidad di comision social y humanitario na Aruba, Gobernadora Interino di Aruba y un lider cu sigur a haci un gran impacto riba nos comunidad y su coleganan.


LOGRO

E trabow di Reclassering, ta beneficia nos comunidad henter.

Stichting Reclassering en Jeugdbescherming Aruba a logra realisa varios proyecto cu a impacta su clientenan y comunidad den forma positivo. Algun di e proyectonan aki a ricibi reconocimiento local y internacional riba tereno humanitario y social.


Entre otro;

- Na aña 1997, Stichting Reclassering en Jeugdbescherming a cuminsa cu un forma inovativo di duna informacion den forma di ‘carousel’, cual scolnan ta uza te cu awendia


- Mentorenproject, cual a sera nomina pa e prestigioso reconocimento “Appeltje van Oranje” na aña 2020


- Leerwerktraject


- Begeleid kamer wonen (cas pa hoben nan husticiabel)


E organisacion ta gradici tur instancia y persona cu ta traha hunto cu nan tur dia pa haci un cambio positivo den e bida di clientenan, pa asina contribui na un Aruba mas sigur, cu menos criminalidad.

META DI CELEBRACION

E fundacion ta invita un y tur pa sigui e Facebook page ‘Stichting Reclassering Aruba’ pa asina ricibi tips practico y gratis riba tereno di exito personal.

Un meta di Stichting Reclassering en Jeugdbescherming ta, pa sigui aplica metodonan inovativo, pa sali afo den un forma mas preventivo y pa ta mas den contacto cu nos comunidad henter. Riba dia 8 di mei 2021 Stichting Reclassering en Jeugdbescherming ta cumpli 60 aña di existencia. E organisacion lo estrena un imagen nobo y material informativo pa facilita su clientenan y comunidad en general.


For di nan experencia di trabow extenso, Stichting Reclassering en Jeugdbescherming Aruba por constata factornan cu ta keda bin dilanti riba nos isla, pues cu por wordo clasifica como ‘factornan criminologico’. Algun factor criminologico mas prevalente den nos comunidad ta; e situacion financiero, e relacion den famia, e maneho di tempo liber y e estado emocional di e persona.

Stichting Reclassering en Jeugdbescherming ta sinti cu si cada persona ricibi e oportunidad pa traha riba e areanan aki, den forma positivo, constructivo y preventivo, e mesun factornan aki por converti nan mes den factor di exito personal.


Den forma di video, programanan di radio y informacion gratis online, Stichting Reclassering en Jeugdbescherming lo duna informacion y conseho na comunidad henter, parti den 4 tema;


- NOS HOGAR [educacion na cas y relacion den famia y pareja]


- NOS CARTERA [maneho di budget]


- NOS BIENESTAR [estado emocional, salud mental y adiccion]


- NOS TEMPO LIBER [maneho di tempo liber]


Un grupo particularmente vulnerabel den nos comunidad ta e grupo di hobennan cu ta pasa di scol primario pa scol secundario. Stichting reclassering kier brinda 60 hoben cu ta den necesidad, pa drenta e fase aki di nan bida den un forma mas stabiel possible.


Pa e motibo aki e fundacion ta haci un apelacion na comunidad henter, ciudadanonan y companianan, pa contribui den forma di un donacion monetario. E fondonan recauda lo wordo uza pa yuda 60 hoben ricibi material di scol pa e aña escolar 2020-2021.

E invitacion ta keda na Aruba henter pa sigui [Follow] e Facebook page di Stichting Reclassering Aruba y pa [Share] e informacion cu sernan keri, amigo y coleganan cu por haci uzo di e sosten.


Negoshi of personanan cu por contribui na e recaudacion di fondo pa yuda 60 hoben, por haci un donacion riba cuenta bancario di Stichting Reclassering en Jeugdbescherming - CMB 61178310 - of por tuma contacto na 582-1496.

2 views0 comments

©Bo Informado