Haime Croes Director DIP:

3 compania local di agricultura awor por expande nan produccion di berdura




Manera cu comunidad por a tuma nota di dje den medionan di comunicacion, Ministerio di Desaroyo Teritorial, Infrastructura y Medio Ambiente ta hiba un maneho cu ta promove comunidad pa planta. Minister Marisol Lopez - Tromp ta atendiendo cu e otorgacion di e peticionnan pa tereno y diferente departamento tambe ta activo cu control di e terenonan aki.


Director di DIP Haime Croes a splica cu tin tres aspecto importante cu ta tene cuenta cu ne den e maneho di otorgacion di terenonan di huur cual ta:

  1. Seguridad di cuminda / plantacion recreacional

  2. Prolongacion di permiso (verlenging)

  3. Tereno comercial pa agricultura cu enfoke riba inovacion


24 di september 2020, a firma y otorga tereno na 3 compania existente pa nan tin espacio pa amplia nan produccion cual ta: Cunucu Fresh, Local Pride y 297-Farm. Esakinan ta e prome companianan cu a honra nan peticion, pero tambe tin diferente peticion nobo cu DIP a ricibi pa tereno pa eherce agricultura comercial.

E tres companianan aki ta eherce agricultura comercial cu enfoke riba inovacion haciendo uzo di greenhouse. E sistema di planta aki ta encera un edificio cera, cu sistema di awa y den algun caso e ta funciona hasta cu panel solar. E companianan existente aki ta ehempel pa mustra comunidad kico nos por logra na Aruba den agricultura.


Sr. Croes a indica cu e meta di Ministerio ta keda pa sigui stimula mas hende pa planta y considera metodonan inovativo cu ta hacie posibel pa planta durante henter aña.

Ta importante pa produci hopi pa nos mercado local pasobra actualmente Aruba ta importa hopi fruta y berdura. Pesey pueblo por spera cu den e proximo dianan lo tin mas otorgacion di tereno pa agricultura comercial y no comercial den diferente bario na Aruba, sr. Croes a termina bisando.



1 view0 comments

©Bo Informado