GOBIERNO TA CUMPLI CU PALABRACION HACI CU HULANDA, PA TRECE TRANKILIDAD


Prome Minister Evelyn Wever-Croes diaranson ultimo den reunion den Parlamento a duna un splicacion amplio di e palabracionnan haci cu Hulanda. Manera indica anteriormente e intencion ta pa cada kwartaal crea un Agenda di Ehecucion cu ta sigui e agenda di ehecucion anterior den forma coherente y cronologico.

Siguiendo e proceso aki a yega na e di dos Agenda di Ehecucion. Despues di un periodo di introduccion, e di dos Agenda di Ehecucion ta consisti di trabounan mas intenso y concreto. Por indica como observacion cu pa ambos ekipo Hulandes como tambe ekipo di Aruba e intensidad di trabounan relaciona cu e Agenda di Ehecucion ta aumentando. Hopi biaha por pensa cu esaki ta un reto pa ekipo di Aruba so pero hecho ta cu ekipo Hulandes tambe ta haya su mes ta maneha e intensidad di e trabounan.

No obstante e punto di antencion aki por indica cu Aruba y su ekipo ta cumpliendo den gran forma cu e condicionan pa asina por ricibi sosten di likides. Un aspecto cu a wordo enfatisa y reconoci den carta di secretario di estado Knops dirigi na Parlamento di Hulanda dia 26 di maart 2021.

E di dos Agenda di Ehecucion tambe ta simbolisa e inicio di un etapa unda cu lo cuminsa diseña e proceso di dialogo cu actornan relevante. Diahuebs prome di april a tuma luga e prome sesion, pa cu e trayecto aki. E sesion lo ta uno virtual cu gremio y sindicato.

Por indica cu Aruba ta cumpliendo den gran forma cu e rekisitonan pa por ricibi sosten di likides y asina traha den direccion di recupera nos pais. E periodo nos dilanti lo ta un intenso pa e diferente ekiponan involvi y lo rekeri un esfuerso colectivo. Adicionalmente por indica cu lo inicia e momentonan di consulta cu actornan clave pa locual ta temanan relevante

“Nos lo keda haci e esfuerso pa alinea e landspakket cu nos Masterplan Reposicionando E Rumbo di Nos Pais pa asina yega na un miho resultado pa nos Isla.Nos ta riba bon caminda pa pone Aruba bek na di prome luga cu respet, madures y dedicacion, hunto nos lo recupera nos pais”, Prome Minister Evelyn Wever-Croes a duna di conoce.

11 views0 comments

©Bo Informado