GOBIERNO MESTER BAHA PROME CU ZINK ARUBA MAS AINDA!

Updated: Feb 16



Betico Croes d.f.m. den un sclamacion di frustracion y desespero a denuncia su propio gobierno cu no tabata sirbi interes general. Aruba ta pasando door di un periodo sumamente difícil, NO pa motibo di e pandemia so pero pa motibo di mal gobernacion, corrupcion di dia cla y un falta enorme di vision, liderazgo, moralidad y husticia. Un gobierno mediocre cu a priminti di tin e solucion pa e megadebe cu ela hereda y sinembargo a presenta como unico logro entrega di nos autonomia.

Te ki dia nos mester sigui acepta corrupcion di dia cla door di miembronan di e gobierno POREDmep? E ta un berguensa nacional pa constata cu tin investigacion contra diferente minister di e gobierno anterior y den 3 aña di e gobierno actual, parlamentarionan mester a tuma nan retiro y a manda un Minister cas pasobra e tabata papia e berdad. Un berdad cu no tabata cumbini e gobierno, pasobra elo a trece nan den problema cu Otmar Oduber. Un persona cu ta wordo investiga tambe pa posibel casonan di corupcion.

Pakico UPP ta urgi e gobierno pa entrega retiro? For di prome cu eleccion pasa UPP como unico partido politico a boga pa un “zakenkabinet”. E motibo ta cu UPP a premira cu pa Aruba sobrevivi e maneho devastador di e gobierno anterior(AVPOR) lo tabata necesario tuma medidanan menos popular manera Betico Croes a hasi despues di cierre di Lago. Betico Croes no a pensa riba e siguiente eleccion, pero a tene cuenta cu e bienestar general di e siguiente generacion. Historia a mustra cu e decision a resulta cu MEP a wordo exclui di e prome gobierno den e Status Aparte, pero e medida a scapa un deterioro financiero y na final di cuenta a fungi como fundeshi pa un desaroyo economico fenomenal.

E gobierno actual a faya riba tur tereno. A sucumbi pa e presion y abuso politico hulandes, pasobra no tabata tin e vision ni tampoco un Compromiso Nacional, manera Betico Croes SI a logra, pa por demonstra determinacion pa logra saca Aruba for di e cataclismo cu e gobierno anterior a laga atras. A prefera di apoya un minister cu a hasi mofa di nos Estado di Derecho, enbes di para pa verdad, moralidad y husticia.

E cherry riba e bolo ta e dos casonan cu recientemente a keda trata door di Corte y na unda a keda exponi e maniobranan cu e gobierno actual a haci pa a retira un colega Minister cu kier a traha integro y transparente.

Parlamentarionan cu ta sostene e gobierno aki ciegamente y e Presidente di Parlamento a bai todo por todo, incluso haciendo uso di actonan penal, pa purba retira e Minister.


Ora cu “el tiro le salió por la culata” y nan a wak cu nan no a logra nan proposito, Conseho di Minister mes a usa mentira y astucia pa "schaakmat" e Minister y retir’e.

Pa esaki y hopi otro motibonan valido, UPP ta considera cu e gobierno actual POREDmep haci suficiente daño na pais Aruba y su Pueblo, y nan mester tene honor na nan mes y entrega nan retiro pasobra di e STEMPELPARLEMENT aki no por spera nada bon y lo percura pa NO zink Aruba mas ainda!

8 views0 comments

Recent Posts

See All