Fundacion Parke Nacional Aruba ta lansa nan prome “Nature Photography Competition 2020”



ORANJESTAD, ARUBA – Durante un conferencia di prensa, Fundacion Parke Nacional Aruba (FPNA), conhuntamente cu ARTN Photograpy y Aruba Bank a duna inicio pa loke lo bira e prome competencia di fotografia di naturalesa organisa pa FPNA.


Naturalesa a bira mundialmente un di e actividadnan di recreacion mas popular durante e ultimo lunanan. Bishitantenan por recrea y relaha disfrutando asina di e bunitesa y rikesa cu naturalesa ta ofrese. FPNA como e fundacion encarga cu maneho di Parke Nacional Arikok, siteo Ramsar Spaans Lagoen, Parke Marino Aruba y reservanan natural ta invita un y tur cu tin un pasion pa fotografia pa explora e areanan aki y captura e rikesa di nos naturalesa y asina aki tambe participa y recrea den e areanan protegi na un manera sostenibel.


E competencia lo conta cu 2 categoria di participacion. Categoria 1 lo ta “Young Nature Photographer of the Year” pa muchanan te cu 17 aña di edad. Categoria 2 lo “Nature Photographer of the Year” pa adultonan riba 18 aña di edad. E ganadornan di ambos categoria lo ricibi un premio di Afl. 500,- cash y lo wordo ilustra ariba e carchinan di miembrecia anual di Parke Nacional Arikok.


Ariba diamars 24 di november proximo, lo oranisa un Workshop di fotografia, cual lo wordo presenta pa Ayrton Tromp di ARTN Photography unda lo duna un tayer basico di fotografia, pa asina por saca e mihor potretnan.


Inscripcion ta habri entrante 17 di november te cu 6 di december y ta bai solamente via reservations@arubanationalpark.org. Tur informacion di e competencia ta disponible riba e sigiente link: https://adobe.ly/35EtkFu y sigi nos riba Facebook: Aruba National Park.






9 views0 comments