Fundacion Parke Nacional Aruba:

E trabou di conservacion como tema principal durante e prome “Conservation Week Aruba 2020”



ORANJESTAD, ARUBA – For di 26 di juli pa 1 di augustus, Fundacion Parke Nacional Aruba (FPNA) ta celebra su prome siman di conservacion, un siman di consentisacion y educacion cu lo wordo ripiti den e añanan nos dilanti.


Natasha Silva, Director di Conservacion, ta splica mas ariba e importancia di un evento asina: “Na FPNA nos a nota un aumento grandi den e interes publico riba e tema relaciona cu naturalesa y sostenibilidad, mientras tambe nos ta nota un aumento den menasanan pa e biodiversidad di nos isla y e conservacion di nos habitat y ecosistemanan.” Mientras su contesta por sorprede hopi, especialmente unda recientemente a logra proteha 16 reservanan natural, Sra. Silva ta continua bisando: “Lagami splica un poco mas...”


E desafionan ambiental, ambos local y global, a cambia e manera cu nos ta hiba conservacion di naturalesa na un manera drastico durante e ultimo decadanan.


Cu esaki nos ta pensa riba menasanan global manera cambio di clima y acidificacion di nos lama. Na nivel local nos trabou di conservacion ta keda un desafio si nos tuma nota di e aumento den populacion humano y turismo, unda esaki ta pone un presion riba e capacidad di carga di nos isla, deterioracion di tera (erosion, salinacion y perdida di fertilidad di e tera), polucion (aire, awa, tera – incluyendo substancianan toxico), desaroyo di nos costanan, deterioracion di e salud di nos ecosystemanan, sobre pesca, introducion di especienan invasivo manera, tilapia, boa, sapo y perdida di biodiversidad. E lora y paloma azul ta especienan cu a bira extincto na Aruba, e patrishi y conew ta casi bira extincto, sin lubida nos especienan endemic manera e cascabel, prikichi, shoco y varios otro especie di flora y fauna cu ta na peliger di extincion. Sra. Silva ta enfatisa: “Nos mester preveni extincion di nos especienan, cu desaparicion di especienan, nos ta perde un parti importante di nos identidad Arubiano”.


Na mesun momento tin varios rason pa celebra. Siman pasa, 16 reservanan natural nobo a ser traspasa bou maneho di FPNA. Hunto cu areanan protegi, Parke Nacional Arikok, siteo Ramsar Spaans Lagoen, Aruba su areanan protegi ta contene ecosistemanan y habitat importante manera, areanan di duinen cu un vegetacion unico, paisajenan di nos seronan, areanan di awa y rooi, cual ta hogar pa varios especienan endemico y / of especienan cu ta na riesgo di extincion manera, 10 especie di sternchi, raton di anochi, dori, y otro insectonan manera barbulet, y otro polinadornan. Awo mas cu 20% di nos isla ta protegi y FPNA ta maneha tambe 4 “Marine Protected Areas” dentro di e Parke Marino cual ta cubri un total di 6020 hectarea. Maske e por mustra hopi, ta rekeri hopi mas pa asina salvaguardia populacion di flora y fauna cu ta core riesgo di extincion.

FPNA ta trahando pa un tempo caba conhuntamente cu Aruba Birdlife Conservation y Global Owl Project, riba un proyecto di Shoco, y lo continua durante e añanan nos dilanti, desaroyando asina proyectonan di conservacion conhuntamente cu partnernan local y internacional. Trahando hunto ta clave, pero e enfoke riba recuperacion di biodiversidad y mehoracion di e salud di nos ecosystemanan so no ta suficiente.


Sra. Silva ta continua: “Como un comunidad nos mester cambia nos manera di pensa y cuminsa desaroya un comportacion sostenibel. Nos mester mira nos isla como un ecosystema grandi unda nos como humano ta un parti di esaki. Naturalesa no ta simplemente un obheto. Naturalesa ta rondona nos tur, y e ser humano ta un parti crucial pa naturalesa. E manera di pensa aki no ta limita naturalesa pa areanan protegi solamente. Un ehempel di esaki ta cu nos por nota cu cascabel, shoco y prikichi ta wordo mira tambe den areanan cu no ta un reserva natural, pero ta wordo categorisa dentro di e “Spacial Developmen Plan 2019” como ‘Natuur en Landschap’, ‘Landelijk Gebied’ y hasta den areanan urbano. E areanan aki di un forma of otro mester ta conecta cu “Green Corridors” pa asina nos fauna por continua cu nan ritmo y viaha natural. Nos por haci un poco mas tambe unda nos ta hasi areanan urbanisa mas rico den naturalesa. Akinan ta unda nos ta papia den un ekilibrio entre construcion y biba cu naturalesa. “Si nos logra esaki, mi ta kere firmament cu Aruba lo ta un lugar unico y ehempel pa mundo henter”. Ademas, dor di salvaguardia nos recursonan natural lo benificia economia di nos isla. Destrucion continuo di esaki lo tin un impacto negativo ariba nos economia, incluso nos industria di pesca y nos turismo.


Conservation Week Aruba 2020 ta celebra Aruba su naturalesa unico, na un forma diferente, unda lo tin varios evenementonan, presentacion digital cu e expertonan di conservacion di FPNA, un seso sport riba rednan social y lo culmina cu un “Rough Hike” den naturalesa.

FPNA lo sigi stimula consentisacion general y lo continua cu e trabou duro den e añanan nos dilanti, contribuyendo asina na un futuro sostenibel pa Aruba su hendenan. Sra Silva ta termina: “Aruba su naturalesa ta bunita, unico, fragil y diverso. Dor di maneha menasanan, enfocando riba trabounan di conservacion y traha pa un futuro sostenibel ta responsabilidad di nos tur como cuidadano, gobierno, fundacionan, sector priva y comunidad en general.”