Fundacion Parke Nacional Aruba:

Reservanan natural awor maneha pa FPNA



ORANJESTAD, ARUBA – Cu e realisacion di Parke Nacional Arikok dia 24 di augustus 2000, a formalisa e prome reserva natural pa Aruba, pa cual Fundacion Parke Nacional Arikok (FPNA, cual a cambia despues pa Fundacion Parke Nacional Aruba) ta hiba su maneho. Ariba 13 di september 2012, Aruba Birdlife Conservation (ABC) - e fundacion cu un empuhe grandi pa realisa e protecion di nos Naturalesa – a entrega un peticion pa proteha 16 area adicional na Aruba cu lo wordo maneha pa FPNA. E mocion aki treci dilanti na Parlamento di Aruba, a wordo aproba unanimamente dia 6 di februari 2013, unda protecion di e 16 areanan y su maneho a bira un realidad.


Na 2017, 3 di e 16 areanan a wordo designa como un reserva natural, como tal, Ramsar area Spaans Lagoen, hunto cu Rooi Bringamosa y Rooi Taki y a wordo traspasa bou maneho di FPNA. Un aña despues na 2018, Parke Marino Aruba a wordo realisa y wordo traspasa officialmente bou maneho di FPNA na aña 2019.


E ta cu grato placer cu FPNA a wordo nombra como e fundacion cu lo maneha e reservanan natural designa na aña 2020, como tal, Duinen California, Arashi, Saliña Tierra del Sol (Important Bird Area – IBA), Saliña Malmok/Saliña Serca, Saliña Palm Beach, Bubaliplas (IBA), Sero Teishi, Rooi Manonchi, varios islanan di Rif y areanan di Mangel, Rooi Lamunchi, y un area na Sero Colorado. E reservanan natural ta contene ecosistemanan y habitatnan importante - manera nos duinen cual ta un area vulnerable cu ta wordo caracterisa pa su vegetacion unico, paisahe di nos seronan, collection y reserve di awa y nos rooinan – pa cual varios especienan edemico, ambos vulnerable y na peligro di extincion, manera e Bubi, Shoco, Prikichi, Raton di Anochi, Coneu, Dori y varios insectonan (barbulet y otro bestianan cu ta polinisa flor).


Cu e maneho di e areanan adicional aki, ta premira cu mas cu 20% di Aruba ta destina como un reserva natural, unda e comunidad di Aruba por ta sigur cu e protecion di e areanan aki, conhuntamente cu e flora y fauna, lo tey pa e proximo generacionan.


FPNA ta sumamente contento cu e traspaso aki, cual ta un avanse y contribucion inmenso pa cu protecion y conservacion di Aruba su naturalesa cual ta unico. Durante e proximo lunanan nos dilanti, FPNA lo ocupa su mes cu e responsabilidad nobo aki y lo cuminsa traha riba e diferente plan di manehonan.


FPNA kier a felicita Gobierno y comunidad di Aruba, unda a indica claramente cu conservacion ta un aspecto importante na momento cu nos ta desaroyando un futuro sostenibel. Ademas, FPNA ta expresa su aprecio pa e passion y dedicacion di ABC pa cu e realisacion di e reserva naturalnan.



2 views0 comments

©Bo Informado