Fundacion Arubano di Esnan Visualmente Incapacita

FAVI, Fuerte

Cu e lema aki FAVI ta incia su accion di donacion 2021



Manera tur aña y cu hopi entusiasmo, FAVI a haci inicio na su accion di donacion pa aña 2021.


Cu e meta pa recauda fondonan necesario pa asina FAVI por sigui brinda tur

su servicionan, cubri su gastonan manera transportacion pa e clientenan

(diesel, mantencion di busnan etc.), pa e actividadnan di cliente individual

of den grupo, pa cumpra medionan auxiliar avansa pa e cliente por haci

uso di dje pa e diferente lesnan, tambe pa cubri otro gastonan operational

y inversionnan.

No ta nada facil pa biba cu un limitacion di bista. FAVI tey pa yuda y guia

personanan cu problema di bista pa nan por desaroya nan mes dentro di nan

posibilidad, pa nan por biba un bida mas independiente cu ta posibel.


E servicionan cu FAVI ta ofrece na e cliente cu problema di bista ta entre otro, cheqeo di bista, guia den e uso di medionan auxiliar,lesnan di computer, typeles, brailleles, les di cushina, grupo di conversacion. Banda di tur esaki tambe FAVI ta pone atencion na actividad social, manera FAVI-do (grupo di obra di man), les di gym etc.

FAVI su servicio na clientenan ta completamente gratis y esaki ta danki na e donacionnan cu FAVI ta ricibi tur aña di e comunidad di Aruba en general, comerciantenan y diferente clubnan di servicio.


Durante di e apertura, directora sra. Cetty Baarh a duna un corto splicacion

di e accion di donacion en general. Sra. Charlene Marchena,

guia di actividad di FAVI a duna un bista di tur e servicionan cu FAVI ta

ofrece y sra. Naftaly Koolman, adulto hoben, mama y cliente di FAVI a splica

kiko FAVI ta nifica den su bida como un persona cu limitacion di bista.

Durante di e mainta aki, FAVI a entrega lista na 1 colectante nobo di FAVI,cu

desde awe lo cuminsa colecta cerca su donadornan


FAVI ta termina e articulo aki, stimulando abo pa bira un donado di FAVI y

aporta na e accion di donacion. Pa mas informacion con pa bo bira un

donado of pa cualkier otro informacion tocante di bista bo por jama oficina di

FAVI na telefoon 582-5222 of 582-5051 entre 8or am te cu 5or pm.