Fraccion di POR: ta pidi pa haya tur informacion presenta pa Minister Lopez Tromp ter inzage

Tambe pa tur minister ta presente den e di dos ronde di reunion



Lider di Fraccion di POR den Parlamento, Dellanire Maduro manda un carta pa Presidente di Parlamento pidiendo atencion pa dos punto cu mester haya atencion urgente.

Den e carta Maduro ta bisa cu durante e reunion publico di diabierna 31 di juli 2020 cu tabatin e topico di retiro di confiansa den Minister di Ordenansa Teritorial, Infrastructura y Medio Ambiente, drs. Marisol Lopez-Tromp, a bin cu diferente ponencia y acusacionnan na conocemento di Parlamento. Ta trata di informacion cu por wordo considera di sumo gravedad, cu tabata un sorpresa pa parlamentarionan di Fraccion di POR y cu lo tin influencia riba integridad den gobernacion.

E ta indica cu por a comprende for di Minister Lopez-Tromp cu el a comparti e informacion aki (total of parcialmente) cu Prome Minister Evelyn Wever-Croes y como tal, como Lider di Fraccion di POR den Parlamento, lo desea pa Señor Presidente manda e peticion na Prome Minister Wever-Croes pa mas tarda diaranson 05 di augustus 2020 pone e informacion aki ter inzage di miembronan di Parlamento y den Parlamento di Aruba.

Dellanire Maduro y Alan Howell ta considera importante pa haya e documentonan/informacion aki mas pronto posibel pa asina por studia y analice profundamente y tin un base asina pa por saca conclusionnan riba e acusacionnan presenta pa Minister Lopez-Tromp y su efectonan

E otro punto cu lider di Fraccion di POR a presenta den e carta ta un peticion na Señor Presidente pa pidi Prome Minister Wever-Croes pa durante tratamento di e segundo ronde di e reunion publico riba e topico di retiro di confiansa den Minister Marisol Lopez-Tromp, tur minister di Gabinete Wever-Croes por ta presente den sala di Parlamento pa asina por haya e claridad necesario riba varios punto di importancia pa Pais Aruba.

E peticion aki ta bin mirando cu e mandatario di Infrastructura tabatin cierto declaracionnan contra algun di su coleganan minister y ta importante pa nan por ta presente y scucha nan banda di medaya.

Fraccion di POR ta lamenta cu ta te aworaki tur e informacionnan aki a wordo presenta na parlamentarionan y un biaha mas ta remarca cu ta importante pa trece claridad riba tur e puntonan presenta pa Minister Marisol Lopez-Tromp y tambe pa esunnan cu el a indica cu lo presenta den e di dos ronde y cada minister mester para responsabel pa nan actonan.


7 views

©Bo Informado