Fraccion di MEP ta felicita FADA cu siman di locura


Fraccion di MEP a haci bishita na FADA (Fundacion Anti Droga Aruba) en coneccion cu ‘siman di locura’. Esaki ta un siman unda cu FADA ta usa diferente manera pa por pone mas atencion na prevencion di droga bou di nos hobennan y comunidad en general. FADA tin un equipo chikito di profesionalnan, pero hopi bon prepara, cu ta haciendo trabounan inmenso pa nos Aruba. E siman di locura ta e highlight na tur e scolanan basico specialmente y ta e siman tambe unda cu ta brinda mayornan e oportunidad pa por habri e combersacion ariba abuso di droga cu nan yiunan na un edad basta jong. Cada dia di siman tin algo diferente cu e hobennan ta wordo concientisa ariba dje, cu ta haci un impacto ariba e hoben cu e ta keda corda y comprende mas mihor loke ta abuso di droga.


Red Box

FADA a laga na cada scol e famoso ‘red box’ cu ta yena di informacion ariba e problemanan cu abuso di droga ta trece cu ne, eyden tin materialnan cu maestronan por usa ariba un manera creativo pa splica e muchanan tocante efectonan di adiccion. FADA a haya ayudo di comercio pa por a logra duna cada scol na Aruba un ‘red box’ y den futuro lo kier pa cada klas haya un caha asina, pa tur aña e studiante por keda haya educacion ariba e tema na su mes nivel.


Precupacionan di FADA

Na Aruba bebemento di alcohol bou di nos hobennan ta alarmante, y e pretexto cu e ta parti di nos cultura no ta yuda e causa tampoco. FADA a constata den nan charlanan na scolnan cu ta di chikito tin muchanan ta purba alcohol bou di supervision di nan mes mayornan. Mas ainda na Aruba no tin control estricto tampoco ariba supermercadonan, ni barnan cu ta bende alcohol na menornan di edad, ni tampoco mayornan cu ta laga nan menornan di edad cumpra alcohol pa nan den e establicimentonan aki. Y mescos ta conta pa sigaria tambe. FADA ta preocupa tambe cu e abuso di marihuana cu tin bou di nos hobennan di un edad hopi jong, y nan tin indicacion cu esaki a crece e ultimo tempo aki.


Puntonan di atencion pa Parlamento

Nos bishita na FADA no tawata solamente pa felicita FADA cu e siman di locura cu ta un exito, pero tambe pa haya for di nan cu ta den e trabou tur dia, cua ta e puntonan di atencion cu FADA kier pa haya prioridad. Parlamento ta hopi preocupa pa mira cu ariba e ramo di adiccion e atencion tawata limita, y cu ta danki na Social Crisis Plan cu a logra concretisa algun proyectonan na bienestar di e ramo aki. Parlamento lo kier sigui insisti pa cu e atencion y ayudo pa e fundacion aki y otronan den e ramo crece, pero tambe pa por tin e siguransa ariba continuacion di proyectonan cu ta exitoso. E proyecto ‘Paga Tino’ ta un bon ehempel di esaki, pa falta di coperacion necesario di otro departamentonan, e personal cu ta haya training no por a caba cu e trainingnan pa motibo cu nan departamento no a duna dia liber pa por atende esakinan. Tambe FADA kier mira un mihor control ariba barnan supermercadonan cu ta bende alcohol y esnan cu ta bebe y stuur. Esnan cu ta core bou di influencia, no solamente tin di kita nan rijbewijs sino tambe haya un multa halto y dianan preso. Un punto cu tambe ta importante ta pa concientisa propetario di e barnan cu nan mester actua mas responsabel y stop di sirbi un cliente bebida alcoholico ora un e ta burachi.


Conclusion

E team di FADA no ta para keto den nan trabou, nan passion ta pa preveni cu nos cuidadanonan sufri bou di cualkier adiccion. Pa november FADA lo ta estrenanando un serie di videonan di concientisacion cu lo causa un impacto grandi bou di nos comunidad y ta pidi Aruba completo pa keda pendiente pa esakinan. Fraccion di MEP a keda satisfecho cu e bishita na FADA y ta uni tambe na e causa pa un Aruba liber di droga, Parlamentario Tevreden a termina bisando.


6 views0 comments

©Bo Informado