Fraccion di MEP kier pasa un ley pero no kier screen nan mesun Ministernan


Lider di fraccion di AVP, sr Marlon Sneek a enfatisa cu ningun momento, fraccion di AVP lo forma parti di weganan politico sin sentido of lo participa na maniobranan cu realmente no tin sentido.

Swegun sr Sneek ta for di siman pasa a manda un carta pa Presidente di Parlamento Ady Thijssen, pa duna e unico fraccion den oposicion, tempo suficiente pa por haci pregunta riba e ley di screening di Minister cu a wordo presenta pa aprobacion den parlamento.

“Sinembargo manera a bira un custumber caba cu tanto gobierno como Presidente di Parlamento, e peticion aki no a wordo honra y awor kier pretende cu AVP ta hunga wega politico y a pidi oportunidad pa trece reaccion riba e ley di screening prome cu yega na tratamento di e ley di integridad.

Tin diferente punto cu pa AVP ta importante cu mester tin den e ley pero nos a tuma nota cu no a worry cu esaki y ningun hende a worry loke AVP kier participa y duna su aporte den su totalidad loke a pone cu fraccion di AVP pesey a entrega un amienda.

Cu e amienda aki AVP kier haci cambio den ley pa haci'e un ley di berdad, un ley cu ta bay hisa e calidad y e nivel cu nan kier pretende di hisa.

Den e amienda ey AVP mustra c’un persona no por bay duna trabao na su tata, pa por traha directamente cu’ne siendo Minister.

Aki ta mira por ehempel, un di e cartanan cu e Prome Minister di e pais aki, mes a firma caminda el a bisa cu oficina di su tata ta represent'e den asuntonan cu ta regarda gobierno y e pais y cu ta cay bou di su responsabilidad.

Pero manera semper nan a bay contra di e amienda pasobra e fraccionnan cu ta sostene gobierno kier defende papa y esey ta e berdad cu tin.

Esaki ta e mesun hendenan cu ta pretende di ta transparente pero e gabinete cu ta sinta aki, lo ta bon pa ban cuminsa na midi nan.

Esaki ta e hendenan cu ta papia di integridad cu boca yen pero si bo ta serio bo ta tuma e amienda di AVP y nos lo a para 100% banda di nan.

Fraccion di AVP a bin pa vota, cu su amienda pero a bisa dor di e fraccion di MEP cu no ta tuma e amienda pero si kier piki algun cos bent'e den un nota di cambio pa bisa cu a tene cuenta cu e amienda pero esaki di berdad no ta e realidad.

Nan kier hunga e rol cu nan ta transparente pero e no ta funciona asina ey y p’esey tabatin un amienda pa por drecha e ley cu tin awe riba mesa.

Awor ta pretende cu tin un ley cu ta bay garantisa transparencia, siendo cu na e pais aki, hendenan a screen via un Landsbesluit.

Unico cambio cu mester a tuma luga, cu e ta bira di un Landsbesluit pa un Landsverordening pero no mester pretende cu no tin nada y tambe pretende cu nan ta bay salba mundo.

Tanten cu no pone den e ley loke cu AVP ta haya ta importante pa ta den dje, no por conta cu AVP su sosten y pa tal motibo fraccion di AVP a vota contra di e le y nos a presenta un amienda, pasobra nos kier garantisa pueblo cu di berdad lo bay tin transparencia, cu no ta bay tende manera cu por a tende den sala di Parlamento caminda cu den bijbel mes ta bisa, bo mester honra bo mama y bo tata.

P’esey papa tin cu haya tur e trabaonan y esey ta inaceptabel ya cu tur hende mester tin e mesun derecho di por participa y haya e oportunidad pa duna gobierno servicio.

No por ta asina cu pasobra cu ta ruman di Minister, p’esey e ruman ta haya trabao den e oficina di Minister caminda tin biaha ni cu e diploma cu e mester tin, pero si c’un salario barbaro.

E cosnan ey fraccion di MEP no kier para p’ y e ora AVP no por para cu nan pa sostene e ley aki manea cu el a wordo preenta,” lider di fraccion di AVP a declara.




11 views0 comments