EVENTO DI BANDERA PA METANAN MUNDIAL PA UN DESAROYO SOSTENIBLE

Hunto pa e SDGs




25 di september, paisnan rond mundo ta celebra e prome lustro di e Metanan Mundial pa un Desaroyo Sostenible (SDGs). Na Aruba tambe e bandera di SDGs ta wordo hisa conhuntamente y den solidaridad cu otro paisnan rond mundo. Aruba tambe ta para keto na e importancia di e agenda 2030 di Nacionan Uni y e Metanan Mundial pa Desaroyo Sostenible (SDGs).


Prome Minister Evelyn Wever-Croes pa e ocacion aki a manda palabranan di saludo y felicitacion via un video enfatisando cu pa Aruba tambe e Metanan Mundial pa un Desaroyo Sostenible ta un prioridad. Den Aruba su plan di Gobernacion, henter coalicion a compromete su mes na implementa e SDGs. Asina tambe, un biaha mas Gobierno a demostra su compromiso na e SDGs na inicio di Gobernacion ora cu na januari 2018 a reinstala e comision di SDGs cu ta encarga pa duna direccion strategico y implementa e metanan di desaroyo sostenible na Aruba.


E Evento di Bandera pa Metanan Mundial pa un Desaroyo Sostenible ta tuma luga diabierna 25 di september. Mundo henter por mira e saludo y felicitacion di Prome Minister Evelyn Wever-Croes poniendo Aruba den un luz positivo mei mei di un crisis cu ta afectando henter mundo. Mandatarionan di diferente pais ta participa na e evento importante aki.


Dilanti di Bestuurskantoor tin un banner di SDGs. Gobierno di Aruba ta invita pueblo di Aruba pa pasa saca potret pa asina por keda cu un recuerdo bunita di e ocacion importante aki na unda cu SDGs ta cumpli nan di 5 aniversario.



2 views0 comments