EDUCACION PA ADULTO TAMBE TA PARTI DI VITAL ATENCION

Na unda tur adulto tin oportunidad pa sigui un estudio segun su interes



ORANJESTAD- Movimiento Electoral di Pueblo semper a trata sistematicamente pa eleva calidad di educación y di bida di su ciudadanonan na Aruba.

Pa por cumpli cu e adelanto den sector laboral cu ta pidi pa cursonan specifico riba nivel profesional intermedio, plannan ta ser haci pa nivela y implementa un nota di maneho tocante Educacion pa Adulto, na unda ta ofrece facilidadnan local pa estudionan riba nivel di enseñansa superior y a la vez crea condicionnan pa haci mas uzo di “distance learning”.


Educacion pa Adulto ta nifica crea facilidadnan pa nos ciudadanonan por hisa nan nivel di educacion. Fuera di enseñansa general, mester tene cuenta cu sector priva tin cierto exigencianan cu un trahado mester cumpli cu ne pa asina e por eherce su funccion debidamente. Teniendo esaki na cuenta Educacion pa Adulto lo forma un luga vital den e programa 2021/2024.


Siguramente facilidadnan na unda tur adulto tin oportunidad pa sigui un estudio segun su interes. Aki por haci uzo di facilidadnan y experticio di Instituto Pedagogico Arubano, Universidad di Aruba y di Biblioteca Nacional den e empeñonan pa optimalisa y nivela e bida di e adulto.


Tres punto primordial den e Programa di Movimiento Electoral di Pueblo riba e tematicanan aki lo ta:

  • Adaptacion y ampliacion di programanan curicular cu ta tene cuenta cu desaroyo holistico di e ser humano pa nan por ta bon ciudadano Arubano y di mundo. Programanan curicular cu ta stimula e.o. identidad nacional, cultura, idioma, salud, matematica, historia y derecho estatal den enseñansa primario, secundario/preuniverisitario.


  • Lo percura pa ofrece programanan practico y innovativo na adulto aplicando un bon andragogia y stimula siña pa bida na e adultonan. Dicho programa mester ta acopla cu sector laboral y segun nan necesidadnan.


  • Stimula accionnan practico, manera reciclahe, plantamento di mata, evita uzo singular di plastic y conservacion di awa y coriente pa proteha nos medio ambiente.


Proyectonan pa hende grandi ta stimula e calidad di bida, esaki ta e compromiso cu Movimiento Electoral di Pueblo ta cera cu pueblo di Aruba.

Cu seriedad, responsabilidad y den continuo contacto cu pueblo, Movimiento Electoral di Pueblo lo continua trahando pa Aruba sigui progresa.

Educacion pa Adulto ta garantisa, cu Bo sosten. Y asina Aruba ta avansa. Pa sa mas di Michella su planan por bay riba e website www.michella.org