E prome 12 personanan di Aruba a keda vacuna contra COVID-19! Un momento historico!



ORANJESTAD – Diaranson atardi Minister di Salubridad Pulico Sr. Dangui Oduber tabata presente na Club Don Bosco na Noord pa duna inicio na e programa di ehecucion di vacunacion. Manera ya ta conoci diamars Aruba a ricibi 11700 vacuna di Pfizer for di Hulanda. E meta di Gobierno ta pa vacuna 85% di e poblacion prome cu e temporada di horcan cuminsa. Riba e prome dia a duna vacuna na 10 personahenan di Aruba, tur di nan ta cay sea den e grupo di risico y/of ta cay den e grupo di risico. Tambe 2 enfermera cu ta traha den cuido a ricibi e vacuna riba e prome dia.

Minister Oduber a declara cu den e conferencia di prensa cu riba diaranson despues di Club Don Bosco lo bay duna vacuna na e personal di HOH na HOH mes. Diahuebs lo sigui cu e vacunacion na personal di HOH, ImSan y DVG, diabierna lo continua na HOH y ImSan un biaha mas. Pa diasabra e intencion ta pa duna e vacuna na tur e dokternan di cas na Santa Theresita Center na San Nicolas.

Diadomingo lo tin e intencion di bay vacuna e resto di e trahadornan den cuido, asina Minister Oduber a declara. Dialuna dia 22 di februari segun e plan di ehecucion lo bay habri 2 localidad pa vacuna e grupo di 60+. Lo habri Centro Libertador Betico Croes ma Santa Cruz y tambe Santa Teresita na San Nicolas. Entrante 1 maart 2021 tur 4 localidad lo ta habri y den e dianan cu ta sigui nos lo sigui mantene communidad informa.


E localidad cu lo wordo uza pa duna e vacuna ta:

Club Don Bosco na Noord

JFK Education Center na Oranjestad

Centro Libertador Betico Croes na Santa Cruz


Santa Therisita Center na San Nicolas

Personahenan y enfermeranan cu a ricibi e vacuna riba e prome dia ta:

1. Dr. Kelvin Cayama - risk group

2. Ruben Garcia-60 +

3. Jacky Wernet - risk group

4. Jossy Lacle-60 +

5. Siomara Everon - risk group

6. Dr. Joaquin van Trigt - GP

7. Dr. Dhyani Giel -

8. Ronchi de Cuba - risk group

9. Pastor Toti-60 +

10. Olindo Koolman-60 + former Governor

11. Emira Rodriguez-Tromp (Miss Antje)-60 +

12. Jourraine Halabi-Figaroa - Nursing HOH

E vacuna ta di vital importancia pa cada un di nos cu ta biba riba e pais aki, e lo:

1.​Proteha nos mesun salud

2.​Lo scapa bida di hende

3.​Lo crea imunidad

4.​Lo percura pa recupera nos turismo y cuminsa bolbe bek poco na normalidad

Minister Oduber ta haci un yamada na pueblo di Aruba pa registra pa vacuna riba e Aruba Health App of na e 4 MFA nan na Aruba. Minister a menciona cu ya caba 11 mil hende a registra pa ricibi e vacuna. E vacuna ta e unico manera cu tin pa combati COVID-19 pa asina sali afor di e pandemia aki.


Aruba, ban vacuna, ban cuida nos mes, ban proteha nos mes, ban salba bida y percura pa nos por recupera nos turismo y economia bek. Minister Dangui Oduber a gradici Gobierno Hulandes, Gabinete Wever Croes, Ministerio di Turismo, Salubridad y Deporte, BRA, DOW, IVA, VDA, KPA, Douane y Setar. Finalmente e mandatario a gradici ful e team di DVG y specialmente e team di DBZ cu ta esun encarga pa duna e vacuna. Aruba ta conta cubo, den paz, union y harmonia nos ta bai logra vence e pandemia aki.

9 views0 comments

©Bo Informado