E derecho riba privacidad relativo na e Ordenansa electoral – Por nenga e kiezersregister si of no?



Den e ultimo dianan aki e derecho riba privacidad ta un topico hopi actual den nos comunidad. E prome mandatario di nos país a expresa cu no lo bai otorga e asina jama’kiezersregister’ na e partidonan cu ta participando na e proceso electoral di nos país. E ponencia di su persona tawata cu entrega di esaki lo ta bayendo línea recta contra di e derecho riba privacidad. Si e argumento aki ta corecto of incorecto abo como lector lo saca bo conclusión na e final di e articulo aki. Den e articulo aki lo dedica atención na art. 8 EVRM (Tratado Europeo di Derechonan Humano), nos Constitución (Staatsregeling), Ordenanza di registro di persona (Landsverordening persoonsregistraties) y e Ordenanza electoral (Kiesverordening). Tuma nota cu e obhetivo di e articulo aki ta pa informa y educa comunidad for di e perspectiva huridico.


Ta importante pa remarca cu e derecho riba privacidad ta un derecho reconoci pa Tratado Europeo di Derechonan Humano y constantemente ta wordo treci como disputa dilanti Corte Europeo di Derechonan Humano (EHRM). E derecho di privacidad tambe ta ancra den nos constitución (art. I.16 Staatsregeling Aruba) y cualkier ciudadano por haci un apelacion riba e articulo aki na Aruba ora su derecho fundamental wordo atacha. E articulo aki ta subraya entre otro cu cada ken tin derecho riba nan bida di famia y priva. For di tratado y nos propio constitución por saca afor cu e estado no solamente tin obligacionnan negativo pero tambe obligacionnan positivo pa cumpli cune pa salvaguardia e derecho riba privacidad di un ciudadano. Cu obligacionan negativo nos ta referi cu Gobierno no mester mete den e bida priva di su ciudadanonan. Mi kier enfatisa si cu e derecho riba privacidad NO ta sin limite. Inciso 2 di art. 8 EVRM ta stipula cu un interferencia cu e derecho aki ta posibel y hustificabel ora cu e tin un base legal, e ta sirbi un meta legitimo y ta necesario den un comunidad democratico.


For di e alinea anterior por saca afor cu e derecho riba privacidad por wordo limita. Laga nos evalua esaki un rato den e contexto di nos leynan. E Ordenansa Electoral ta stipula den articulo 10 inciso 2 cu e Minister encarga cu Asuntonan General tin e obligación pa suministra organisacionan político cu a entrega un lista di candidato copia di e kiezersregister. Un kiezersregister ta un registro cu ta consisti di nomber di votadornan, fecha nacimento, lugar di nacimento y su adres. E ta absolutamente corecto pa bisa cu esakinan ta datonan personal di ciudadanonan di Aruba. Pero corda cu un interferencia den e derecho riba privacidad ta posibel si tin base legal, e ta sirbi un meta legitimo y ta necesario den un comunidad democratico. Aruba a duna mas contenido na art. I.16 di nos Constitución door di introduci e Ordenanza di registro di persona (Landsverordening persoonsregistraties). Bo por considera cu e ley aki ta complimenta e derecho fundamental riba privacidad menciona den nos constitución. Art. 2 sub e di e Ordenanza di registro di persona (Landsverordening persoonsregistraties) ta stipula explícitamente cu e Ordenanza aki no ta aplicabel pa e Kiesverordening. Cu otro palabra e Ordenansa Electoral ta cai bou di un excepción.




Pa recapitula kier enfatisa cu e otorgamento di e registro di votadornan tin su base den ley, esta art. 10 Kiesverordening. Además e protección di privacidad di e ciudadano pa loke ta trata e proceso electoral ta wordo exclui. Manera a indica den e alinea anterior e Ordenanza di registro di persona no por wordo aplica pa e Kiesverordening, pasobra ta e propio ley ta stipula esei ‘met zoveel woorden’. E siguiente pregunta ta si e meta di otorga e kiezersregister ta uno legitimo? E contesta riba esaki ta un SI. Nos ta papiando di un proceso electoral democrático y cu tin cu wordo vigila pa evita cualkier tipo di irregularidad of infracción cu por resulta den atacha e proceso electoral. Door di no entrega e kiezersregister difícilmente bo por hiba un control efectivo y pa salvaguardia nos democracia. Riba e pregunta si e ta necesario? E contesta ta un si, pasobra atrobe CERO control lo nifica cu e proceso democrático ta core peliger.


A base di e análisis por conclui cu e decisión di NENGA pa otorga e kiezersregister na partidonan político ta un decisión cu hustamente ta desafía y ta bai empugna cu e propio excepcionan cu e propio Tratado Europeo di Derecho Humano ta stipula. Adicionalmente e ta bai línea recta contra di nos mesun leynan. Cu e prome mandatario kier salvaguardia derecho riba privacidad ta algo noble, pero esaki lo mester sosode via canalnan formal. Lo mester entre otro trece cambionan den nos leynan cu adaptacionan cu lo por exclui cierto información di e registro. Actualmente esaki no ta e caso y partidonan político tin un argumento cu ta fuerte y por culmina den un caso na Corte of hasta ‘intrekking’ di e decisión di e prome mandatario.



33 views0 comments