DURANTE AUGUSTUS ARUBA A RICIBI 80.230 BISHITANTE


IMPACTO DI VARIANTE DELTA A CONDUCI NA REDUCCION


Oranjestad – Aruba Tourism Authority ta informa cu pa luna di augustusnos destinacion a ricibi un total di 80.230 bishitante ‘stay-over’.

Si compara luna di augustus 2021 cu augustus 2019 -cu tawata e ultimo aña normal di turismo, por deduci cu Aruba a recupera cu 83% di locual awordo ricibi na augustus 2019. Remarkabel ta e hecho cu Hulanda ta mustra un crecemento di 34% compara cu augustus 2019.

RECUPERACION DI NOS TURISMO

Aruba ta sigui recupera fuerte desde e re-apertura di nos frontera na juliaña pasa y por mira e tendencia di recuperacion mensual pa e aña aki ta mustra bon. Sinembargo despues cu CDC a pone Aruba den e categoria 4,por a nota cu e grado di recuperacion pa augustus a reduci pa loke ta bishitantenan pa nos destinacion.

Pa e prome 8 luna di 2021, Aruba a ricibi un total di 506,795 bishitante.

E proyeccionnan pa di dos mita di aña ta mustra cu lo por sigui duna un adelanto y ta proyecta pa cera 2021 cu un recuperacion di 74% di turismo compara di loke Aruba ricibi na aña 2019.

Aruba ta wordo representa den tres diferente continente. Norte America ta e mercado mas fuerte y entre januari pa augustus 2021 un total di 446,499 bishitantenan Norte Americano a bishita Aruba. Esaki ta 88.1% di total di nos turistanan. Durante e mesun temporada, Europa a trece 28,566 turista pa Aruba cu ta 5.6% di e total di bishitantenan. Un total di 18,236 turista cu ta representa 3.6% tawata procedente di Latino America. 2.7% -cu ta 13,494 bishitante, a bishita nos isla for di otro partinan di mundo.

TURISMO CRUCERO

Na juni Aruba a habri atrobe pa ricibi turismo crucero y na augustus 2021 un total di 12,342 pasaheronan crucero a bishita nos isla riba 9 diferente barco. Turismo crucero lo sigui ta un proceso di recuperacion gradual. Dijuni pa augustus 2021, Aruba a yama bonbini na un total di 20,861pasaheronan crucero, cu a bishita nos isla riba 16 diferente barcon den e periodo aki.

Ta bon pa recorda cu e situacion di e barconan crucero ta recuperando y ainda tin barconan staciona den un asina yama ‘Warm lay-up’ cual kiermen cu e barco ta riba un standby, wardando riba instruccion na momento cu operacionnan re-inicia. E actividad aki ta produci cierto entrada pa nos economia entre otro unda e barconan ta abastece nan productonan localmente. No tin turista riba e barconan pero solamente e minimo na tripulante (skeleton crew) y nan mester cumpli estrictamente cu tur protocol local y internacional pa loke ta e pandemia actual.

Poco poco nos industria di turismo lo ‘normalisa‘ bek cu ahustacionnan pa asina tene e seguridad di e bishitantenan como tambe e localnan na prome luga.

TOURISM CREDITS / CENTRAL BANK OF ARUBA

Di acuerdo cu Banco Central e asina yama ‘Tourism Credits’ (cual anteriomente tawata wordo yama ‘Tourism Receipts’) pa e prome kwartaal di aña 2021 a contribui cu AWG 554.5 miyon den nos economia, cu ta 46% menos compara cu e mesun temporada na 2020.Esaki naturalmente ta debi na e pandemia global di Covid-19 unda Aruba tambe a cera su fronteranan temporalmente.

E IMPORTANCIA PA VACUNA Y SIGUI MANTENE NOS MES NA E PROTOCOLNAN

Aruba Tourism Authority ta sigui traha fuerte riba e recuperacion turistico, enfocando no solamente riba cantidad di bishitante, pero tambe riba e maneho solido di e organisacion di A.T.A. y e maneho duradero di nos producto turistico.

E participacion di nos comunidad pa loke ta trata vacuna y pa mantene nos mes na e protocolnan estableci door di diferente instancia ta masha importante pa baha e cantidad di casonan positivo di Covid-19 y su variantenan na Aruba. Asina nos economia ta recupera y por sigui progresa.

Corda cu solamente hunto nos por vence pa asina nos isla y su turismo por sigui florece!