DNM ta duna les di e module Zuil Milieu na Scol pa Polis



ORANJESTAD - Ayera mainta director di Directie Natuur en Milieu (DNM) Sr. Gisbert Boekhoudt a duna les di module Zuil Milieu na Scol pa Polis na 33 studiante cu ta den nan ultimo aña pa logra nan MBO-diploma niveau 4, asina nan bira Polis oficialmente.

E module cu DNM ta presenta ta consisti di dos parti esencial pa e examen di e studiantenan pa polis cu ta aproba pa Examen Bureau di Departamento di Enseñansa. E prome parti ta teoria y e di dos parti ta un proyecto cu mester trata dos problema cu ta existi den nos medio ambiente. Pa esaki e studiantenan a forma team di dos persona. Algun di e topiconan cu a bin dilanti tawata: uzo di botonan di placer riba lama, reciclahe y maneho di sushedad, piscamento na baranca y lama, especienan protegi, maneho di desperdicio manera taira y bateria, gas dañino pa medio ambiente, sushedad den lama y damnan, dumpnan ilegal, autonan bieu y bandona, maneho di pesticida y asbestos.


En corto, e studiantenan por a haci uzo di tur topico cu ta trata cu e impacto cu hende y uzo di materialnan no organico tin riba e medio ambiente.

Algun preocupacion di parti di e studiantenan cu a bin dilanti tawata: e cobamento (afgraving) di parti di, pero no limita na industria so pero tambe esnan cu ta scoge di coba den suelo na mondi, spuitmento di piedra den area natural, hendenan cu ta bay coy santo blanco y cocolishi na lama, cu tambe ta prohibi. Tambe e topico di contaminacion di suelo pa medio di azeta bieu y unda ta deshaci di dje.

E module aki cu DNM ta duna tur aña na e studiantenan di examenklas di Scol pa Polis ta cubri e topiconan manera: e cuadro di ley cu DNM ta traha cu ne cu ta cubri asuntonan di naturalesa y medio ambiente; e maneho y tareanan di DNM; e proyectonan andando relaciona cu e formulacion di maneho di nos lama y condicion di nos suelo y asunto di awa grijs.

DNM tin un tarea conhunto cu KPA como cu tin un colaboracion den e Milieu Samenwerkingsteam (MST) mayoria biaha tambe den colaboracion cu Serlimar, BCI y DVG.

DNM a keda hopi satisfecho di e entusiasmo di e 33 studiantenan aki, y Sr. Boekhoudt a termina dunando nan palabranan di exito y a encurasha nan pa bay pa e puntonan mas halto den e proyecto nan dilanti pa eexamenjaar y module Zuil Milieu.

4 views0 comments