Diferente organisacion den sector publico a completa training intensivo riba tereno di comunicacion


Oranjestad - Durante e prome simannan di aña 2021 un total di 70 profesional den sector publico a participa y a completa un training intensivo yama ‘Integrated Marketing Communication for Behavioural Impact (COMBI) in Health and Social Development’.

E training a wordo presenta den un forma virtual pa dr. Everold Hossein di World Health Organization (WHO) y a wordo organisa pa Departamento di Asunto Social (DAS) den colaboracion cu Sociaal Crisis Plan (SCP) y UNICEF Hulanda. Un di e metanan nan principal di e training tabata pa introduci un perspectiva nobo den e area di comunicacion cu e enfoke ariba aspectonan y of problemanan riba tereno di salud y desaroyo social.

Durante e training diferente profesionalnan den sector Social, Salubridad Publico, Enseñansa y Husticia, a haya e oportunidad pa sinta hunto y delibera riba “puntonan di atencion” cu nan kier trece un cambio na dje.


E profesionalnan a ricibi herment pa enfoca riba problemanan specifico y tambe diferente tips con pa aplica strategianan di mercadeo y diferente metodo di investigacion y comunicacion. Cu otro palabra e profesionalnan a wordo ekipa pa enfoca ariba aspectonan cu nan kier haci un cambio na dje en conexion cu e comportacion of opinion di e comunidad cu lo por trece un posibel solucion pa e problemanan specifico cu nan ta enfrenta. Pa por a finalisa exitosamente e 8 dianan intensivo di training, e 70 profesionalnan mester a duna un presentacion di un proyecto of campaña cu nan lo kier lansa den nan organisacion.

Comision organisatorio di DAS, SCP den cooperacion cu representantenan di UNICEF Hulanda y WHO, ta sumamente contento di con e training a cana y ta agradecido na tur participante cu a completa e training pa asina trece un diferencia den cuadro di comunicacion den sector publico.

4 views0 comments