Diasabra por paga impuesto di vehiculo di motor di aña 2021


Acudi na oficina principal na Camacuri



ORANJESTAD – Departamento di Impuesto ta participa na tur contribuyente cu mester paga impuesto di vehiculo di motor di aña 2021, cu su seccion di Servicio di Caha na oficina principal na Camacuri, lo ta habri diasabra dia 23 y 30 di januari pa brinda un servicio extra. E orario di servicio lo ta di 8 or pa 11 or y mey di mainta.


Riba diasabra lo brinda e siguiente servicionan:

1. Por paga impuesto di vehiculo di motor (of otro tipo di impuesto).

2. Registra auto.

3. Entrega plach’i number.


Ta importante pa menciona cu por paga unicamente cu debit card. Solamente e personanan no-comerciante di edad 60+ por paga nan impuesto cu cash. Alabes no ta posibel pa paga e impuesto di aña 2021, si no a paga e impuesto di e aña(nan) anterior completamente.


Departamento di Impuesto lo sigui e reglanan di DVG estrictamente y p’esey lo acepta un cantidad limita di cliente den sala. Alabes Departamento di Impuesto ta recomenda tur contribuyente fuertemente pa haci uzo di pago online via banco na lugar di para den rij. E sistema di e banconan ta simpel, facil y sigur.


Ultimo dia pa haci pago di impuesto di vehiculo di motor di por lo menos e prome mita di aña 2021, ta 1 di februari 2021.

Gerencia di Departamento di Impuesto

22 di januari 2021

5 views0 comments