Dia Internacional Contra Abuso di Droga y Traficacion Ilicito



Dia 26 di juni ta dia Internacional Contra Abuso di Droga y Traficacion Ilicito.

Na aña 1987 ‘Asamblea General di Nacionnan Uni’ a scoge e fecha di 26 di juni como e fecha oficial Contra Abuso di Droga y Traficacion Ilicito.


Mundialmente riba e fecha aki nos ta enfoca pa concientisa y enfatisa ariba e peliger di adiccion na droga y traficacion ilegal.

Un problema cu ta deteriorando humanidad y cu ta toxico pa e bienestar di e hoben enparticular y cu ta trece cune problemanan socio-economico y instabilidad.


Ora ta papia di e uzo y abuso di droga, por pensa no solamente ariba droganan ilegal pero tambe droganan legal manera alcohol, tabaco y entre otro remedi prescribi.

Ora ta trata di droganan ilegal por pensa ariba marihuana, cocaine, xtc-molly, LSD, crack, GHB etc.

E uzo di droga por trece cune entre otro problemanan cu salud fisico/ mental, financiero/ economico y social cu por conduci cu mentalmente y fisicamente e persona ta bay depende na un substancia legal of illegal. Ora un persona ta depende di substancianan aki nos ta papia di adiccion.


Na Aruba tin diferente departamento/ fundacion cu ta brinda informacion, ayudo y sosten na personanan cu tin un addicion.

  • F.A.D.A. (Fundacion Anti Droga Aruba)

  • F.M.A.A. (Funacion pa Maneho di Adiccion di Aruba)

  • Respaldo

  • SPD (Social Psychiatrische Dienst)


Durante aña F.A.D.A ta traha riba e area di prevencion tratando e tema di uzo y abuso di droga legal y illegal. F.A.D.A. ta ofrece diferente charla/workshop y programanan riba e topico di droga y adiccion na diferente scol rond di Aruba, companianan, gruponan social y mas. Nos ta cuminsa cu prevencion for di e edad di 4 aña. Tur presentacion ta riba nivel di e edad di e participantenan. Nos ta ofrece diferente herment/ tools pa nos muchanan por aplica ora nan encontra nan mes den cierto situacionnan relaciona cu e tema, nos ta siña nan pa para fuerte y siña bisa NO. Nos ta siña nan tocante consecuencianan cu e uzo di droga tin y mucho mas. Asina for di un edad jong nos por educa nos muchanan pa tuma bon decision den bida y siña nan kico ta bon y kico ta malo. Aruba tin un ekipo grandi cu ta guarda y sostene nos comunidad pa asina combati traficacion ilicito.

Traficacion ilicito ta e intercambio, bendemento y dealmento ilegal.

Por pensa ariba:

  • Arma

  • Droga

  • Bestia

  • Hende

  • Remedi

  • Producto imita

  • Placa


E team cu ta combati traficacion ilicito ta entre otro:

  • Kustwacht

  • Guarda nos Costa

  • Kpa ( Korps Politie Aruba)

  • CCMA (Coordinatie Centrum Mensensmokkel Aruba)

  • Douane

  • Interpol


En conexion cu e fecha aki F.A.D.A. kier sigui crea conscientisacion y prevencion ariba e uzo y abuso di droga legal y ilegal. Por medio di e articulo aki nos ta haci un yamado na pueblo di Aruba pa sigui cuida nos bienestar general incluyendo nos salud fisico y mental door di mantene un bida liber di droga y alcohol.


Pa mas informacion of pa cita por tuma contacto cu F.A.D.A. na number di telefon 583-2999 of nos whatsapp line 564-4516 y nos e-mail info@fada.aw. Corda bishita nos website www.fada.aw


PREVENI TA MAS MIHOR CU LAMENTA



4 views0 comments