“DIA DI BOLUNTARIO Y DIA INTERNACIONAL DI CLUBNAN LEO!”


O’stad - Dia 5 di december ultimo nos a recorda cu 63 aña pasa e prome Club Leo a wordo forma y asina brinda e oportunidad na hobennan pa desaroya nan cualidadnan di lider den nos comunidad.


"Aruba One Happy Island Lions Club” ta uni su mes na felicita tur boluntario riba Dia Internacional di Boluntario, especialmente na tur Clubnan Leo na mundo, pa e Dia Internacional di Clubnan Leo”. Clubnan Leo ta un programa patrosina pa Club di Leonnan, caminda ta crea lidernan bao di nos hubentud, cu e lema Liderazgo Experiencia y Oportunidad. Danki na e trabao y dedicacion di nos boluntarionan nos por mehora e calidad di bida di hopi ciudadano cu ta biba den situacion dificil.


Na 1957 Sr. Jim Graver tabata coach hobennan den un wega di bala y e posibilidad ta cu e bala aki ta uno di baseball. Sr. Graver tabata e coach di baseball di Abington High School na Pennsylvania, Estados Unidos y tabata un miembro di Glenside Lions Club. Cu e ayudo di su compañero Leon, William Ernst, e prome club Leo a wordo funda riba 5 December 1957.

Como e promer Club di Leo na mundo, Abington High School Leo Club a crea e nomber Leo, cual ta deriva di Liderazgo, Igualdad y Oportunidad, na ingles Leadership, Equality and Opportunity. Nan a scoge e colornan maron y oro pa sirbi como e colornan di Clubnan Leo. Despues e palabra Igualdad a wordo cambia pa Experiencia.

Na 1967, e directiva di Club di Leonnan Internacional a adopta e programa di Clubnan Leo como un programa oficial di e asociacion. Cual programa a bin ta crece pa e ultimo 50 añanan. Servicio na comunidad ta keda e meta principal di e programa. Miembronan di Clubnan Leo ta disfruta pa sirbi nan comunidad y aprecia e resultado positivo cu esaki ta trece cune.


“Aruba One Happy Island Lions Club”, e club nobo di Leonnan funda na 2017 ta fruta di e hobennan cu den añanan 90 a lanta y forma parti di Leo Club of Aruba. Awe Aruba One Happy Island Lions Club ta contento y orguyoso di tin como miembro ex-Leonan di e tempo ey manera Armando Boekhoudt, Carla Martinus, Eugene Dubero, Ferdinand Gregory Curiel, Geraldine Frank, Indra Hassell-Duarte, Mildred Tromp, Ronald Laclé, Vanessa Olive, Sergio Duarte y Junior Arends. E ex-Leonnan menciona ta fundadornan y miembro di e club mas nobo di Leonnan “Aruba “One Happy Island Lions Club”. E pasion pa sirbi nos comunidad y crea mas lider ta ancra den e curason di e miembronan di e club di Leon. Awe Miembronan di Aruba One Happy Island Lions Club tambe kier gradici Aruba Lions Club cu e


tempo ey a duna e hobennan e oportunidad pa por a forma parti di e club. Awe nos como club nobo ta sigui propaganda y biba e lema “We Serve”!. Como club un di nos metanan ta pa sigui crea oportunidad pa hobennan por ta lidernan den nos comunidad. Den cuadro di esaki Aruba One Happy Island Lions Club ta den e fase inicial pa forma un club LEO nobo, Aruba One Happy Island Leo Club. Tur hobennan entre 13 cu 18 aña y 19 cu 30 aña cu tin e deseo di sirbi comunidad y conoce y crea amistadnan nobo of ta desea mas informacion por tuma contacto cu nos na ohilclubaruba@gmail.com of bishita e facebook page di Aruba One Happy Island Lions Club. Pronto nos lo tin mas informacion.


1 view0 comments