DI TRES CUMBRE ‘VIRTUAL’ CU SINDICATO Y GREMIONAN COMERCIAL

Prome Minister Evelyn Wever-Croes


Gobierno di Aruba, den tur transparencia a invita gremionan sindical y empresarial na e di tres cumbre pa hunto den consulta tuma decision riba e negosacion di Hulanda pa e likidacion financiero. E cumbre aki lo ta via zoom y lo tuma luga diaranson 12 di augustus cuminsando 3or di atardi. E encuentro aki por wordo sigui via pagina di Facebook di Gabinete Wever-Croes y via TeleAruba. Di e manera aki, Gobierno di Aruba, na un manera transparente ta haci posibel pa tur hende por sigui e encuentro aki un biaha mas pa asina e informacion yega tur caminda.


Prome cu Covid-19 a dal no solamente Aruba duro, sino tawata un sla mundial na unda cu tur ciudadano di nos mundo a sinti e efecto di e pandemia aki, Gabinete Wever-Croes tawata riba e bon caminda pa sanea e situacion financiero caotico cu a encontra na 2017. Gabinete Wever-Croes a entrega na 2019 un presupuesto cu un surplus di 14 miyon florin. Na 2020, algun dia prome cu entrada di Covid, Gabinete Wever-Croes a entrega un surplus di 40 miyon florin. E ultimo aña cu Aruba a conoce un surplus den su presupuesto tawata na aña 2008, e aña prome cu Gabinete Eman 1. Kiermeen cu e gobierno di AVP niun aña den su 8 aña di gobernacion a entrega un presupuesto cu surplus pero si presupuestonan irealistico y cu deficitnan grandi. Un debe gigantesto. Gabinete Wever-Croes a demostra cu por sanea un situacion financiero malo. Gabinete Wever-Croes por y a logra. Y cu determinacion y sosten di pueblo, lo logra un biaha mas pone Aruba riba e rumbo financiero bek pa asina nos pueblo por sinti alivio cu nos merece.


Covid a cambia rumbo di te hasta paisnan mas grandi cu Aruba. Aworaki nos economia y finansas ta den un estado hopi critico pero e ta temporal. Aworaki nos mester di ayudo. Y esaki ta bay ta e topico principal di e cumbre. Sigui e reunion virtual aki via e canalnan menciona diaranson 12 di augustus pa 3or di atardi.





40 views0 comments