Den tur adversidad polisnan demostrando nan conviccion incondicional na proteccion di nos pais


Cuerpo Policial Aruba pasando den adversidad y retonan grandi for di comienso di e gobernacion aki. Na mas di un ocacion a vocifera e falta di maneho y e prioridadnan robes di e minister di husticia actual pa maneha e cartera aki. Riba esey awor polisnan ta haya nan mes enfrenta cu reduccion salarial durante un pandemia historico, sin tene na cuenta e sacrificio y riesgo adicional den e temporada dificil aki den nan trabounan diario.

Robert Candelaria, biniendo di un trayectoria / background policial amplio y significativo a duna su puntonan di bista cu aun asina, polisnan dedica a demostra tur dia cu nan conviccion y dedicacion na siguridad y proteccion di pais Aruba ta intacto. Multlipe casonan resolvi manera di droga, abuso contra mucha y otro investigacionnan criminal, extra oranan largo cumpli pasobra di e necesidad pa extra presencia policial, diferente caso di esfuersonan maximo na rescate di bida humano den peliger, intermediacion diario den casonan familiar y social, y asina por keda menciona e trabou inmenso cu cada polis ta pone pa sigui tene e nomber di e Cuerpo y nos seguridad en general den halto.

Ta na su luga pa duna palabranan di sosten y elogio na tur cu ta forma parti di nos Cuerpo Policial cu ta haci nan esfuerso tur dia, contra tur reto, pa cumpli cu e huramentacion sagardo cu nan a haci di sirbi pais.

3 views0 comments