Den seno di MEP mes ex lider ta yama Prome Minister pa entregista


Parlamentario Benny Sevinger mescos cu hopi otro, a wordo sorprendi pa un discurso di Gobernado na apertura di otro aña parlamentario nobo, pa falta di un cosnan importante y concreto riba cantidad di asunto importante.

“Por a scucha gobierno cu e mensahe cu ta pidi pa union pero e punto interesante ta cu no tin unidad mes entre gobierno y parlamento sigur despues cu Parlamento na tres ocasion a bisa gobierno cu nan no ta acepta e Rijkswet y esaki a wordo pusha pa e fraccion mas grandi cu ta sostene e mesun gobierno aki, cu ta fraccion di MEP.

Fraccion di RED y tampoco esun di POR a mustra na varios ocasion cu nan no ta sostene e Rijkswet aki di Hulanda.

Pues aki claramente ta bolbe keda confirma cu no tin unidad entre gobierno cu Parlamento pa nan ta riba mesun liña y awor con e mesun gobierno aki por kere cu comunidad por ta uni na momento cu e gobierno mes ta demostra cu tin discordia entre su propio hendenan.

Anto riba dje ta bon cla cu no tin unidad den partido MEP, ya cu con por splica pueblo c’un ex Prome Minister y ex lider di partido MEP, tur dia ta pone algo riba rednan social y den noticia, mustrando cu e lider actual, Evelyn Wever Croes, ta un entregista.

Cu e ta bay entrega autonomia di nos pais cu tanto otronan a lucha p’e, cu Betico ta draai den su graf, cu Hulanda ta un abusado y e ora ta puntra ta cual ta e mensahe cu e gobierno aki kier duna den su propio partido?

Aki tin cu nota cu ta e ex lider di partido MEP, tata di un colega den conseho di minister, ta bisando cu Prome Minister ta haciendo cosnan di traicion contra e pueblo aki ya cu e ta entregando Aruba su autonomia.

Di ki unidad e ora gobierno y su Prome Minister ta papiando di dje? Pero ora cu e señora aki papia e kier trece dilanti cu e unidad mester ta cu oposicion pero oposicion a mustra su disponibilidad na tur momento.

Na momento cu e pandemia a start, nos a coopera pa reunionnan, pa pasa presupuesto sin haci pregunta, fraccion di AVP a coopera na tur momento cu nos a wordo pidi pa coopera.

Pero no por ta asina cu den cuadro cu Prome Minister kier mustra Hulanda cu tin un unidad, bo kier yama fraccion di AVP pa sinta na mesa, duna nos un par di cifra, sin un contenido, sin un dialogo pa asina nos por trece solucionnan real dilanti.

Den parlamento fraccion di AVP a trece puntonan pa bisa Prome Minister tur loke nos ta premira cu e tin cu bay negocia cu Hulanda riba dje, cambio pa loke ta trata Rijkswet, nos no ta kere den Rijkswet, ya cu Statuut ta duna nos otro formanan di cooperacion, por ehempel protocol, pro ehempel acuerdonan cu bo ta regla den Statuut y si esakinan no resulta, bo por bin cu KB, por bin cu maatregelen cu gobierno di Reino por tuma riba bo.

Pero Hulanda no kier tende di esaki y e ora tin cu punta pakico Hulanda no kier tende di e puntonan aki?

Esaki ta bon cla, esta cu tin un desconfiansa ya cu e problema cu Aruba tin na e momentonan aki, ta un desconfiansa entre Hulanda cu Aruba,” Parlamentario Benny Sevinger a declara.


1 view0 comments

Recent Posts

See All