Dellanire Maduro:

Hulanda kier impone riba nos sin ta transparente na nos ciudadonan ni Parlamento.



Hulanda kier pa gobierno bay di acuerdo cu condicionnan cu ningun ciudadano ni Parlamento, cual ta e organo cu ta controla gobierno, por haya sa kico nan ta. Dellanire Maduro, lider di Fraccion di POR den Parlmento ta indica cu esaki ta haci imposibel pa eherce nan funcion como parlamentario y esaki ta contra nos derecho fundamental y ta un falta di respet. Segun Hulanda, Gobierno di Aruba mester tuma decision den 4 dia riba condicionnan stipula den un documento di 218 pagina, cual ta ilogico. “Nos no por acepta ni permiti pa Hulanda “bulldoze” e condicionnan aki riba nos. Esaki no ta manera pa trata un pueblo den necesidad, famia cu 0 Florin di entrada cu ta depende di banco di cuminda pa sobrevivi. Mundo no a pidi pa COVID-19, esaki ta abuso di e circunstancianan. Ningun parlamentario den su sano huicio por acepta cu desicionnan asina crucial di tal idole ta wordo tuma sin haya espacio pa studia, dialoga y negocia e condicionnan aki. Aruba no ta contra di reforma, pero esaki no por tuma luga sin input di Pais Aruba:, Maduro a expresa.

E ta sigui bisa cu prome cu COVID-19, Aruba tabata bayendo den un bon direccion, hasta un surplus di mas di 40 miyon. COVID-19 a paralisa mundo henter, Aruba tambe mester a tuma medidanan pa salvaguardia salud di nos hendenan. Den mesun rosea nos a perde nos entrada principal cu ta turismo di forma abrupto, cu a resulta den un crisis economico y enbes di un surplus COVID-19 a hiba nos na un deficit enorme. Actualmente Pais Aruba ta hayando sosten financiero atraves di un lening di Hulanda, unda cada “tranche” ta mara na condicionnan, cu te awor Pais Aruba a bin ta cumpli cune. Asina mes cu Aruba ta cumpliendo Hulanda no ta duna e oportunidad pa negocia e “tercer tranche” ni kier comparti e informacion di condicionnan prome cu Gobierno bay di acuerdo cu esaki. Mester remarca cu ministernan presente den e openbare bijeenkomst cu a tuma luga diamars a trece dilanti cu varios di e condicionnan ya caba Gobierno a bin ta atendiendo cu nan.

“Mi kier enfatisa cu e placa cu nos ta haya ta un fiansa, no un regalo, nos lo paga esaki bek. Como representante di pueblo den Parlamento, ta imposibel pa acepta condicionnan a ciegas. Atrobe, Aruba no ta contra di reforma, pero esaki no ta manera pa atende cu paisnan den Reino Hulandes. Nos comunidad tambe tin derecho di sa e condicionnan pa asina comunidad henter por ta informa, compronde kico condicionnan aki por significa pa cada un di nos y formula nan mesun opinion cual na e momentonan aki ta imposibel. Tur e condicionnan aki ta bay tin efecto riba nos futuro generacion y ta nos deber pa atende di forma transparente y responsabel cu e toma di decision aki. Nos como ciudadano di Pais Aruba mester uni, nos no por rindi bou presion. Esaki ta falta di respet, falta di solidarismo, falta di empatia, inhumano, un acto di oportunismo”, Dellanire Maduro a finalisa.


10 views

©2020 by Bo Informado