Cuminda di prome necesidad a bira un necesidad di berdad den e tempo aki


Ciudadanonan di pariba di brug a pone parlamentario Howell na haltura cu cos ta bira dia pa dia mas dificil. Sigur pa loke ta pone cuminda ariba mesa. A expresa tambe cu e surcursal di FPNC na San Nicolas tabata cera algun dia. Mesora parlamentario Howell a bay averigua y enberdad esaki tabata e caso. FPNC ta Aruba su foodbank oficial y su sucursal ta situa net band’i Aruba Bank na San Nicolas. Alan a papia cu directora di FPNC Gianaika v/d Biezen-Marin y el a splica cu e sucursal na San Nicolas tabata cera pa masha tiki dia en espera pa haya su stock di comestibelnan. E bon noticia ta cu e sucursal ta habri bek normal. Ciudadanonan ta hopi contento cu e yudansa di FPNC y muy especial cu e servicio profesional y empatia pa cu situacion dificil cu pueblo den necesidad ta pasando aden. Bishitando casnan pa mira con por yuda esnan den dificultad, parlamentario Howell ta experencia cu falta di cuminda na algun cas ta aumentando mas y mas. Esaki tin di haber den liña recta cu perdemento di trabou door di e crisis. Durante di un bishita cortico na e foodbank na San Nicolas, Alan Howell a papia cu varios ciudadano cu tabata en espera pa wordo atendi y a gradici e señora trahado pa su pasenshi y bon trabou.

7 views0 comments

©Bo Informado