COSECHA A UNI DEN E CAMPAÑA CUMPRA LOCAL

Cu apelacion pa sostene comercio na San Nicolas



Oranjestad – Durante e evento cu Minister Xiomara Maduro a lansa e campaña pa Cumpra Local, sra. Joanne Dirksz, directora di Cosecha den representacion di mas cu cien artesano y artista, a dirigi algun palabra na esnan presente y a informa cu Cosecha ta sostene e campaña pa Cumpra Local.


Obranan di artesano y artistanan local

Sra. Dirksz a informa cu Cosecha ta un fundacion cu tin dos tienda cu ta bende arte y artesania, entre otro, joyas, tas, decoracion y hopi otro piesa mas pa e turista y tambe nos hendenan local. Tur articulo cu Cosecha ta bende a haya e certificacion di Seyo Nacional como prueba cu nan ta traha door di artesano y artistanan local. Cosecha ta ubica den e edificio monumental na Zoutmanstraat na Playa y na San Nicolas ta ubica den un edificio cu un bunita diseño riba su fachada den e Caya Principal.


Cumpra Local na San Nicolas tambe

Sra. Joanne Dirksz ta encurasha nos cuidadanonan pa Cumpra Local pa asina yuda stimula economia di Pais Aruba, y pa esaki ta haci un invitacion special pa pasa bishita Cosecha su ‘Creative Center’ na San Nicolas. Banda di obra di artesania di nos artistanan local, Cosecha ta ofrece tambe diferente pakete creativo, pa asina den famia of cu grupo di amistad of colega di trabou por pasa un rato hunto y creativo hunto trahando obra di man. Asina ta ofrece pakete special pa fiesta di mucha, reunion di trabou y 'bridal shower.' Alabes por bishita Cosecha pa cumpra un bunita regalo pa un ser keri especialmente pa e dianan di fiesta cu ta acercando. Sra. Dirksz ta haci un apelacion pa corda cu por haci compras tambe cerca tur nos artesano y artistanan local cu tin nan mes negoshi. E directora di Cosecha ta haci un invitacion na un y tur pa bishita San Nicolas y haci compras den e tiendanan di Caya Principal paso e comerciantenan di San Nicolas tambe mester di e sosten di cada un di nos.


5 views0 comments