CONSTANT “AZRIAH” PALM: INVERSION DEN ENSEÑANSA LO GARANTISA FUTURO DI UN NACION


Un dicho famoso di e conocido politico, inventor y cientifico Mericano Benjamin Franklin cu a influencia mi pensamento y a bira un guia den mi formacion ta: “an investment in knowledge always pays the best interest”. Benjamin Franklin no ta atende aki solamente cu e aspecto financiero, pero ta indica e importancia cu enseñansa lo tin den desaroyo di un pais. Si nos wak rond mundo, enseñansa ta algo sumamente importante y inversionan grandi ta wordo haci pa desaroya e calidad di nivel di educacion. United Nation ta conseha pa e percentahe di inversion den educacion di un pais mester ta 6% di su GDP. Aruba ta cumpli cu e conseho di UN, pero remarcabel ta cu datos ta indica cu e nivel di enseñansa na Aruba ta laga di desea. E cantidad di hoben cu ta keda sinta ta haltisimo. E minister di enseñansa a indica cu un 80% di studiante cu ta bay Hulanda no ta caba nan estudio. Por ultimo, manera mi a señala den un articulo anterior, e cantidad di dropouts ta alarmante.

E pregunta cu ta den boca y mente di mayoria persona cu ta biba na Aruba y vooral esnan cu ta traha den enseñansa ta con pa para e desaroyo negativo aki. Cada gobierno ta duna di conoce nan prioridad durante nan gobernacion y por lo general enseñansa ta hunga un papel prominente, pero nubia scur ta acumulando na horizonte pa motibo di un situacion financiero/economico dificil. Mescos cu inversion den salud, inversion den enseñansa ta core peliger aki na Aruba di wordo corta. E minister di Enseñansa recientemente a declara cu a economisa 18 miyon den presupuesto di enseñana. Pa completa e asunto enbes di union, e ultimo 4 aña a wordo marca pa un diferencia di opinon con pa atende cu e problema den enseñansa entre e mandatrio y e sindicato di maestro. Manera indica a corta den e presupuesto di enseñansa. Ki consencuencia esaki lo bay tin pa desaroyo di enseñana y vooral pa varios scolnan?


Mester bay bira creativo paso e suma cu ta wordo ricibi, no lo cubri tur gasto cu cada scol lo wordo confronta cun'e. Scolnan lo no por cumpra material paso no tin suficiente fondo disponibel. Ora cu nos haci cierto ehercicio(nan), mester haci un evaluacion pa wak kico e impacto lo bay ta. Algun asunto mester wordo drecha y sigur ta bay tin mester di placa. Por ehempel tin docentenan cu te dia di awe no tin un posicion fiho y ta trahando a base di contract. Nos ta exigi di e docentenan pa nan duna di na parti pero no ban lubida cu nan tambe ta ser humano cu merece un bon trato pa e trabou cu nan ta haciendo. Na final di aňa escolar tin di nan cu ta den un incertidumbre paso nan no sa si e siguiente aňa escolar nan lo t’ey para dilanti klas pa educa nos yiu(nan).


E asunto aki mester wordo soluciona na un manera positivo pa asina e docentenan por ta sigur cu nan tin trabou y pa nan por eherce nan funcion cu amor paso un peso grandi a wordo kita for di nan. Tambe lo mester bin cu workshop pa asina upgrade nos docentenan. Desaroyo den enseñansa no ta para keto, e tin su retonan cun'e. Pa locual ta trata mantencion di nos scolnan, UPP lo percura pa nos scolnan haya trabou di mantencion structura y tambe proteha nan di ladronicia y vandalismo. Compra di bukinan, cual ta costoso pa mayornan cu tin problema financiero, UPP lo haci su maximo esfuerso pa mayoria scol secundario tin e asina yama “’boekenfonds’ pa kita e peso di e mayornan. Pa scolnan cu mester di materialnan diferente, lo haci uzo di fondonan existente cu ta colga otro caminda y cu uzo no ta wordo haci di nan. Cu UPP y mi persona den e proximo gobernacion, lo percura pa inverti y destina un suma grandi den enseñansa, paso enseñansa/educacion lo tin un prioridad halto pa UPP.



3 views0 comments