Concurso di Pinta & Kleur


Dia 4 di oktober, dierendag, e voorzitter di e comision di accion cu ta encarga pa ehecuta e Plan Nacional pa atende cu e problematica di cacho na Aruba, a invita prensa na e Centro di Control di Cacho na Wayaca, pa anuncia detayes di un concurso cu a inicia e dia ei. Mescos aña pasa a lansa e Concurso di Pintamento cu a focus riba Ley di Cacho, e aña aki a lansa un Concurso di Pinta & Kleur, cu meta pa sigi concientisa comunidad, especialmente muchanan tocante cuido di nan mascota. E sitio a wordo scohi door cu e pintura riba e Centro di Control di Cacho ta pinta a base di 1 di e 419 pinturanan cu e comision a ricibi aña pasa. Esaki ta pa motiva muchanan pa participa, paso si un mucha no cai den premio mes, su arte por wordo exponi na un of otro forma toch.

Participacion ta gratis y ta habri pa tur mucha, pero ta muchanan di 4 te cu 8 aña di edad lo por cai den premio. Asina e biaha aki muchanan di kleuter tambe por mustra nan creatividad. Por download e formulario na specialprojectsaruba.org caminda tin 3 pagina; e prome ta e formulario di informacion, y e otro 2 nan huntu, ta e formulario di participacion. E participante mester pinta su mascota favorito y kleur tur 2 banda di e formulario di participacion. E pintura mester ta uno original y creativo y e muchanan por usa puntonan di e Ley di Cacho e aña aki tambe. Muchanan tin te dia 5 di november 2020 pa entrega tur 2 banda di nan formulario di participacion na e MFA mas cerca, of via email specialprojectsaruba@gmail.com, y ta 1 formulario so cada participante por entrega. Tin varios caminda cu a ofrece pa ricibi formulario tambe y lo por sigi e pagina di FaceBook di Stima Mi Mascota pa haya mas tocante esaki. E muchanan cu gana lo wordo anuncia riba e mesun pagina di FaceBook aki y lo haya un invitacion pa nan ricibi nan premio riba dia internacional di mucha, diebierna 20 di November. E voorzitter di e comision ta invita henter comunidad pa stimula muchanan participa na e concurso aki pa e concurso ta uno exitoso un biaha mas.

3 views

©2020 by Bo Informado