Colegio Nigel Matthew a bira un realidad honrando un docente cu a dedica su bida na hobennan




Cu lagrima na wowo Nigel Matthew a gradici e honor cu a toca su persona, cu awe su nomber ta pone na entrada di Colegio San Nicolas. Banda di Minister di Enseñansa Rudy Lampe, tambe tabata presente durante un ceremonia diahuebs mainta, excoleganan di Matthew, un ex docente di dje, exalumno y hasta exGobernador Fredis Refunjol.

Tabata bou di e mandatario aki cu a tuma e decision pa cambia nomber di algun scol pa personanan cu merece di ricibi e honor aki. A scoge personanan cu a causa impresion of tabatin su impacto riba e trayectorio cu e hobennan a pasa na e scol en cuestion. Un di nan tabata Colegio San Nicolas.


“Locual nos ta bay efectua awe tin un sentido spiritual. E ta algo diferente cu ora Nigel Matthew a haya su premio di Appel di Oro, pa logronan di henter un bida. Esey ta un reconocemento na su luga pa su trabou den enseñansa,” e mandatario a conta di e logro grandi aki.


Pero esun di cambio di nomber ta algo diferente cu reconocemento na un persona. “Tin un dicho cu ta bisa “ora bo planta un mata, y bo no ta cosecha e frutanan di e mata, y bo sa cu e no ta bay duna bo sombra, e ora bo a compronde bida”. E mandatario a bisa cu riba dia cu mundo ta celebra Dia di Mama Tera, ta e miho momento pa honra un persona cu e carera di Nigel Matthew.


El a bisa cu e legado cu Matthew a laga atras ta uno asina grandi, unda cu e mucha (hoben) ta central. “Esaki ta un legado cu tur dia ora cu e docente- y muchanan drenta e scol y mira e nomber Colegio Nigel Matthew e mensahe lo ta cu e mucha ta central.”


Tambe a menciona cambionan cu mundo ta pasa aden, unda cu COVID-19 ta domina tur caminda, ilustrando cu guera entre humanidad y naturalesa ta uno perdi pa ser humano. Ta maltratando tera y e mensahe cu COVID-19 ta manda ta cu “si boso no cambia boso manera di biba, un bida mas simpel, menos materialista, bida humano lo no bay ta posibel.” El a haci un comparacion di esaki cu enseñansa unda cu mester educa muchanan cu e pensamento di desaroyo sostenibel. Mester forma nan pa scapa Mama Tera. “Mester duna e uchanan e hermentnan pa sobrevivi den futuro y cuida e planeta unico aki pa futuro. Pa futuro generacionnan tambe disfruta di e beyesa di Mama Tera.”


Minister Lampe a admiti cu ta hopi hende a carga e proyecto pa cambia e nomber di scol pa honra un persona. Tabata necesario pa pone un nomber pasobra e nomber Colegio San Nicolas ta ilustra manera San Nicolas no ta forma parti di Aruba. Y e nomber a bini di un comision cu a analisa tur e situacion y a bini cu e proposicion pa nombr’e na honor di Nigel Matthew. Un persona cu a practica e filosofia, segun Lampe, cu “loke bo man drechi haci bo man robes no mester sa” Y semper a traha na bienestar di su studiantenan y a yuda hopi den silencio. Esey ta e motibo cu awe Colegio San Nicolas a bira Colegio Nigel Matthew.


HISTORIA

A establece Colegio Pariba na aña 1977, na ex Club Don Bosco for di unda el a muda despues. Nigel Matthew a cuminsa a traha eynan te cu 1987. Despues di e periodo ey el a bira Con-Rector na Colegio Arubano. Na aña 1992 el a bay atrobe Colegio Pariba unda el a keda te cu 2002 ora cu el a baha cu pensioen.

6 views0 comments

Recent Posts

See All