Clubnan di futbol cu acceso na programanan di computer


AVB a lansa plataforma digital nobo pa tur club


ORANJESTAD, Aruba – 18 di juli 2021: Ta un otro momento grandi pa Arubaanse Voetbal Bond (AVB). Despues di un trayecto basta largo, por fin a tuma luga traspaso di e infrastructura di ICT cu e compania ITP Caribbean a traha riba dje. AVB ta contento di a finalisa trabou di digitalisacion den e federacion.

AVB a ricibi e sistema oficialmente, cual ta uno cu lo centraliza tur informacion. Tur club lo tin acceso y por haci uzo di e netwerk. Pocopoco AVB ta drentando den e mundo cu hopi a bay caba, pero awo tin un sistema cu ta sigur pa tur hende cu bira usuario. Ing. Richard Dijkhoff, Presidente di AVB, a indica cu ta duna nan e oportunidad pa introduci AVB Platform.

AVB Platform ta un plataforma caminda cu e clubnan na momento cu log in den e sistema, ta haya tur acceso cu mester pa hiba nan administracion, pa registra hungadonan y pa por hiba nan maneho financiero. Kiermen tur herment cu nan mester como organisacion. AVB ta facilita esaki por medio di e plataforma.

ITP Caribbean a cuminsa cu cierto infrastructura y esey ta nifica cu un sistema di computer central cu tur software. E idea tabata cu AVB lo pone un sistema disponibel pa tur club di futbol. Jan Segers, director di ITP Caribbean, a splica cu e clubnan por log in riba un centrum system, no tin di cumpra un software of haci algo di nan mes. AVB ta duna esey. ITP Caribbean ta encarga pa mantene e sistema, monitoria e sistema cu ta keda draai 24 ora pa dia y ta disponibel p’e clubnan y AVB.

P’e clubnan, esaki ta un sistema moderno y sigur cu nan por hinca nan datonan aden. Tambe tin e software manera Microsoft Word, Excel, tur esey. Tin software specifico pa financiële administratie y hasta club administratie.

Segers a expresa cu esey tabata un soño di AVB y pa pone un infrastructura asina, mester tin un sistema fuerte, sigur y cu hende ta confia riba dje. E ta asina protegi cu cada club tin nan propio environment y no ta asina cu un club por mira informacion di otro. E ta hopi importante, hopi sigur y facil disponibel.

7 views0 comments