Censo2020


Pa medio di e comunicado di prensa aki, Oficina Central di Estadistica kier a presenta e resultadonan preliminar di Censo2020. Manera ta conoci, e prome parti di Censo2020, esta e Censo Online a yega su final. Entre 1 y 24 di october tabata tin e oportunidad pa yena e cuestionario online of via telefon.


Den e prome parti di Censo2020, un total di 10.105 hogar a wordo conta. Esaki ta encera un total di 28.844 persona cu a wordo conta. Di e grupo cu a wordo conta: 6.003 ta mucha entre

0-17 aña, 18.165 ta adulto entre 18-64 aña y 4.676 ta hende grandi di 65 aña of mas.


Actualmente CBS ta den full preparacion pa e di 2 parti di Censo2020 cu ta encera e manera conoci di bishita cas pa cas. E parti aki lo tuma lugar di 1 pa 30 di november 2020. Un teller di Censo2020 lo bishita tur hogar cu no a completa e cuestionario di Censo2020 online of via telefoon. E teller lo entrevista e hogar y lo yena e cuestionario riba un tablet. E teller lo identifica su mes cu un badge di CBS.


Mirando e situacion actual, CBS kier enfatisa cu tur teller di Censo2020 lo sigui e recomendacionnan stipula door di Departamento di Salud Publico. Tur teller lo hasi uzo di un mondmasker y handsanitizer y lo mantene distancia social.


E helpdesk di Censo2020 lo ta accesibel durante e periodo di 1-30 di november na 524-7444. Por tuma contacto cu e helpdesk di Censo 2020 den horario di oficina.


Un Censo ta hopi importante pa nos pueblo, ya cu e datonan colecta ta yuda guia sector publico y priva, pa por planea a base di situacionnan actual y real den nos comunidad. Durante di e pandemia ta mas importante cu nunca pa ehecuta e Censo pa asina por midi e impacto cu e pandemia aki tabata tin pa nos comunidad. Pa nos por forma nos presente y nos futuro, nos mester conoce e situacion actual di nos isla basa riba datonan real y confiabel.


Pasobra Aruba ta conta riba BO!


14 views0 comments