Cas di Luz di Seroe Preto lo sende den 2020 den sistema di “Drive Through”


Apesar di e situacion di e pandemia di Covid 19 andando y cu tur e medidanan cu no ta permiti aglomeración di hende, Hubentud Uni Seroe Preto a dicidi di toch sende e luznan di Sero Preto na San Nicolas den celebración di nan 35 aniversario como Fundacion. Inoficial nan ta existi ya pa 50 aña cu a cuminsa como “Flying High Park”, despues “Cas di Luz” y no kier a laga e bario pasa fin di aña sin haci algo pa e temporada. E aña aki lo usa e decoración di e aña anterior mes, y ta bai den estilo di “Drive Through”. No tin bendemento di cuminda ni bebida pa recauda fondo ni por yega cerca, ya cu e lugar lo ta cera cu un tipo di cura pa cortesía di Bohama NV. Autonan por pasa wak so, no ta permiti aglomeración di hende ningun caminda ei banda. Lo tin control di Polis pa tur cos bai organisa. Esaki Sra. Selma Helder, vice presente y secretaris di Hubentud Uni Seroe Preto a anuncia awe.

Dia 12 di december 2020 ta sende e luznan di Cas di Luz Seroe Preto 7pm te cu 10 pm y asina tur anochi te cu dia 6 di januari 2021. Ta pidi un y tur pa mantene reglanan vigente di DVG y pasa únicamente den auto so disfruta di e luznan y apesar di tur cos sinti alegría di fin di aña. Selma Helder a gradici tur hende cu a yuda y specialmente e sponsornan Aruba Bank, SETAR y Bohama.


Danki pa semper a sostene e proyecto pa pueblo di Aruba aki cu den e temporada di fin di aña cu e Cas di luznan di Seroe Preto a bira un atraccion bunita.

16 views0 comments