CAMPAÑA VIES DI MIKE EMAN Y AVP A CUMINSA!


No haci wega cu e situacion di Covid pa hunga politica sushi


Mike Eman y su partido berde un biaha mas ta mustra con desespera nan por bira den un temporado di crisis y casi den porta di eleccion. Ta parce cu Mike Eman sa di un tesoro scondi den caha di gobierno cu e tin asina tanto deseo pa bolbe goberna den un situacion na unda cu e pandemia Covid no ta lagando espacio den finansas di nos pueblo.


( Foto original 2017, tipo di campaña aki Mile y AVP ta gusta pa dividi pueblo )

Ta bon si pa recorda Mike Eman cu despues di su 8 aña di gobernacion, despues cu el a destrui finansas publico na prioridadnan completamente robes, enrikeciendo friends, family y lovers di su partido, regalando su prensa veloz y haragan miyones di florin pa floria nan mentiranan pa gaña pueblo, no a keda placa pa e y su partido sigui djodjo. Y riba dje, Covid a dal mundialmente y Aruba su entrada a cay completamente.


Por lo tanto Mike Eman Y AVP tin nada pa bin haci den un proximo gobernacion pasobra no tin placa pa Mike y AVP sigui gasta. Ademas den tempo di abundancia, den e tempo di su gobernacion, Mike solamente a laga Aruba plat den crisis financiero, crisis economico, crisis social. Con e ora e por pretende di por goberna den tempo dificil. Con e por guia un pais den awa bruto si ni den calmo e por a pone Aruba prospera lagando un mega debe y defecit enorme atras.



( Nos team a verifica esaki y ta falso, AVP y su Lider ta desespera pa difunda mentira )

Pero un cos si cu pueblo ta tuma nota di dje ta e viesedad di Mike Eman y AVP cuminsando un campaña hugando cu e situacion di Covid cu nos pueblo ta den. Mike y AVP su campaña pa bay den Facebook di Patrido MEP y coy potretnan biew pa traha nan memes bisando cu MEP no ta respeta reglanan di DVG pa loke ta trata Covid, ta un falta di respet na e inteligencia di nos pueblo. Ta increibel y vies pa wak con un partido por perde asina tanto tempo pensando pa haci cosnan baho asina y ainda kere cu e pueblo ta bay kere nan.


Un palabra na Mike y AVP, Covid no ta wega. Covid a causa y ta causando hopi dolor den nos pueblo. Nos pueblo ta sufriendo pa motibo di e pandemia aki mientras Mike Eman y AVP ta hungando politica sushi.


Awo Mike Eman ta gritando cu e tin e solucion pa e situacion di Covid. E pregunta ta keda e ora, dicon ora cu Prome Minister Wever-Croes a invita Mike Eman pa bin pa ta parti di e solucion, en sali for di su penthouse y trece su plan di rescate? Pakico el a tarda y wak con mas y mas Covid tawata causando mas daño? Mike Eman no tin y nunca tawata tin solucion pa drecha nos pais pasobra Mike Eman nunca a haye den e situacion pa drecha nada. El a goberna den tempo bon so y solamente el a hinca nos pais den problema financiero.




Y contrario na Mike Eman, nos Prome Minister actual, prome cu Covid a dal, a mustra con pa goberna den tormenta. Un tormenta social y financiero cu Mike a causa. E dicho famoso ‘Na regen komt zonneschijn’ semper a traha contrario pa AVP y MEP. Pasobra AVP semper a goberna den zonneschijn mientras MEP a goberna den tempestad y pone solo briya bek pa nos pueblo. Ta pesey e pueblo aki no por scucha mas na Mike Eman. E elecion benidero, no vota pa Mike Eman y AVP bin bek. Pasobra ainda nos ta den tempestad. Y Mike Eman no por goberna den tempo malo. Deposita bo voto den esun cu a mustra di por goberna den tempestad. Y hunto nos lo pone solo briya dushi pa nos pueblo un biaha mas.



Actualidad

( Mike sin respet pa pueblo y pa e pandemia aki a kita tapa boca pa saca potret )


( Mike 18 di Maart 2021 )


Nos ta haci un yamada pa stop di dividi e pueblo aki

133 views0 comments

©Bo Informado