Bureau di Secretario Conseho di Minister di 14 trahado a bay pa 41 trahado


Den conferencia di prensa di fraccion di AVP, mr. Arthur Dowers, parlamentario di AVP, a papia di e palabra “mentira” y e persona “mentiroso” di Prome Minister Evelyn Wever Croes.

“E ta un mentiroso grandi y su nomber di cariño ta 1 april. El a hiba un campaña unda cu el gaña e pueblo grandemente di tur e pasonan cu e lo a tuma pa mehora calidad di bida,” Dowers a bisa den su introduccion.


El a sigui menciona cu a haya e cuentanan annual di 2016, 2017 y 2018 pa trata den Parlamento y el a recorda cu fraccion di MEP a bisa cu algun tempo pasa cu nan lo no trata cuentanan annual di 2016 pasobra esey ta di maneho di AVP.


El a recorda cu AVP den Gobierno a trata cuentanan annual di tur e gobiernonan di MEP y hasta di tempo cu Aruba tabata forma parti di e constelacion Antiano.


“Nos a haci esaki pasobra nos sa cu nos mester a pone nos situacion na ordo pa por sigui traha pero e hendenan aki a bin cu boca grandi y bisa cu no ta vota pa e ley.


Diabierna cu a pasa nos a mira cu nan a bin cu rabo meymey nan pia, manera e dicho ta bisa, pa aproba e cuentanan annual, pasobra Knops a bisa cu esey mester tuma luga.”


Pero tin algo cu a capta atencion di Dowers den e cuenta anual di 2018.

Prome minister Wever Croes tabata bisa constantemente cu Mike Eman tabatin 250 coordinador ta traha den su bureau, cual no ta berdad pasobra tabatin departamento.

Evelyn a bisa cu el a kita tur e 250 coordinadornan y otronan, pues e lo mester a kita rond di 350 hende total pero den e Cuenta Anual ta stipula cu a reduci personal cu 50 persona so.

Pues si Evelyn su gobierno a retira tur hende di gobernacion di AVP, tambe esunnan cu tabata traha na Bestuurskantoor y e cuenta annual ta bisa cu a reduci personal cu 50 persona so, esaki ta nifica cu Evelyn su gobierno a tuma rond di 300 persona den servicio.


Banda di esaki mester tene cuenta cu tin trahadonan a bay cu VUT of a baha cu pensioen pero nada di esaki ta keda refleha den e cifra di personal. No por conclui otro cu a tuma mesun cantidad di hende bek.


Otro triki cu Dowers a constata di Prome Minister ta e personal cu e mandatario mes a tuma cu, segun el a bisa, ta masha tiki mes.


Tempo di AVP e Bureau di Secretario di Conseho di Minister tabatin 14 persona y awo bou di gobierno di Evelyn Wever Croes e Bureau aki tin 41 persona trahando.

Pues banda di esunnan cu el a tuma pa su oficina, el a crea un maniobra pa manipula personal y a pone mas cu 30 persona den srvicio bou di e Bureau di Secretario di Ministerraad.


Di e total di 41 persona, solamente 11 ta ambtenaar poni na nan disposicion.

“E ta tuma nos tur haci, manera semper y e no ta stop cu e campaña di mentira y hasta tin cu menciona cu hasta mandatarionan Hulandes, Prome Minister a baila na cantidad di ocasion.”


Otro punto constata ta cu Eelyn ta hiba un maneho di ping pong pa loke ta coronavirus y Dowers tin sospecho cu cada bes cu adapta e situacion, pasobra esaki ta pa Evelyn mes saca probecho.


E ta pone protocol y maneho, mientras cu e mes ta biaha bay vakantie manera a sosode recientemente y awor e ta pidi pa tur hende local cu biaha bay den exterior ora cu nan regresa, nan pone nan mes den cuarentena di 10 dia.

Sinembargo dia cu el a biaha pa vacacion cu famia na Florida, el a bin y dos dia despues e ta den sala di parlamento mey mey di tur hende y aki ta bolbe confirma e hipocrecia cu Evelyn ta hiba den su maneho di e pais.



6 views0 comments

©Bo Informado