BOOSHI WEVER (UPP): E "AFSCHEIDBELEID" DI ANDIN BIKKER A BIRA UNO SIN GEVOEL!



Nos por a tuma nota cu e despedida di Andin Bikker como minister ta tuma lugar bou di un capa di hopi "sentimento”. E cambio repentino di e Minister a cay manera un baño di awa friu, pasobra pa casi 4 aña, aparte di a hiba un maneho anti-Arubiano, e Minister a luci pa un maneho sin pia y sin cabez y sin ningun tipo di "sentimento " pa e pueblo ni tampoco pa e departamentonan cu ta cai bao di su encargo. Awor cu e falta menos di 2 siman pa su "reinado" termina, e kier haci saltonan mortal pa purba di cumpli cu su "friends & family" y trata na drecha su mal imagen cerca nos pueblo.

Como minister demisionario y un gobierno nobo ey mes tras di porta, diripente ela haya sa cu e.o. Brandweer mester di auto y kier a bay pidi "gevoelens" di Parlamento "vooruitlopend" riba e aprobacion di e presupuesto 2021. For di e carta cu ela manda Parlamento nos por a saca afo cu e tin intencion atrobe pa NO bay den e proceso di un Destaho Publico.

Tambe a pidi "gevoelens" pa un "investering" cu pa colmo NO ta presupuestá mes, cu tambe ta mustra cu lo no ta bay tin un Destaho Publico. E modus operandi aki, di NO bay Destaho Publico ta parce cu a bira un mal custumber cu a ser tuma over di e gobierno anterior di AVP.

E "cherry" riba e bolo di su "gevoelens" como despedida ta e compra di e "SUPER DELUX FORD RAPTOR" pa Guarda nos Costa. E prome pregunta cu ta bin den mente ta KICO un "Guarda nos Costa", cu ya desde 2018 solamente tin e autorisacion pa transporta ilegalnan y/o indocumentadonan, ta haci cu pick-upnan "fancy" asina? Ta ken kier core haci luho den nan? Mas logico lo tabata ta pa cumpra un Van Super Delux.

Un otro pregunta ta cu si mas oferta a ser pidi? Ta necesario pa cumpra pick-upnan "fancy" asina di un balor di mas di 150.000 florin cada uno? Segun informacion esakinan a wordo cumpra cu placa cu Hulanda a pone disponibel. E instancia local Buro Rampenbestrijding Aruba, cu ta esun responsabel pa administra y acorda tipo di inversionnan asina, a duna su aprobacion? Si esaki ta e caso, na Aruba no tin autonan di mesun categoria na un prijs di p.e. di 50.000 florin? Si esaki ta e caso dicon a bay over na compra di 2 vehiculo "fancy" cu ta costa 3 biaha mas? Mesun preguntanan aki lo wordo haci na instancianan Hulandes pasó nos no por sigui tolera pa tipo di compranan inecesario y sin ningun tipo di destaho ta wordo haci, particularmente cu awor tin yen di medida na caminda pa cumpli cu e mesun propositonan Hulandes.

Esaki ta un ehempel clasico di "NEPOTISMO" na unda 2 siman prome cu un Minister baha na awa, kier complace cu algun compinchi di dje! Esaki ta INTEGRO?

Un apelacion ta bay na e Minister Presidente demisionario pa no acepta esaki pasó nos no por acepta cu un biaha mas cara di Aruba ta wordo poni na berguensa. Tambe nos ta adverti e partidonan cu ta formando gobierno nobo y cu lo tin intencion di duna sosten, y cu tin INTEGRIDAD skirbi na grandi, pa repasa e casonan aki di nobo. Ya cu parce cu no ta cumpliendo aki cu ningun clase di Bon Gobernacion. No ta pasó un Minister su "gevoelens" ta asina fuerte pa motibo di su despedida mester comete actonan cu NO ta integro. Ta tipo di maneho asina pueblo di Aruba a rechasa y cu a pone cu Hulanda no tin confiansa mas den gobierno cu a pone cu e gobierno a firma e acuerdo traicionero y strangulante riba "black-friday" aña pasá!!

16 views0 comments