Booshi Wever kier baha su frustracion di no tabata apto pa ta lider di MEP


Pueblo completo por wak na e expresionan haci pakico sr. Booshi Wever no por a bira lider di Mep debi na falta di conocemento y etica. Sigur ultimo eleccion pa di dos biaha pueblo a rechas’e pero te ainda no kier mira e realidad cu su dianan di ta politico ya ta tras di lomba.


Acto baho di ataca gobernador

Sr. Booshi Wever mester por sa mihor cu un gobernador ta ‘onschendbaar’ y no por sali defende su mes. E ta un berguensa pa un hende cu un trayectoria den parlamento y como minister ta acusa gobernador di a permiti kita un minister via comision central mientras segun su persona mester a pasa via un reunion publico. Constitucion ta papia bon cla cu retiro di un minister ta bay den consulta cu parlamento. Gobernador a pidi e sentimento di parlamento y ta keda na presidente di parlamento con e ta haci esaki y e ruta normal ta pa pidi sentimento ta den un reunion di comision central.

Y sigur ta bon pa recorda un ex minister manera Booshi Wever cu retiro di un minister sea ta por medio di un mocion di desconfiansa of otro conflicto den gobernacion cu esaki mester bay por medio di un decreto gubernamental cu ta bay Gobernador.


Sr. Booshi Wever no ta compronde contenido di articulo 43 di Statuto di Reino

E articulo en cuestion ta bisa cu garantianan cu tin di haber cu asuntonan di Reino manera entre otro bon gobernacion en principio ta responsabilidad di cada pais. E unico manera cu Reino por tuma medida pa medio di e articulo aki ta ora un pais actua contra bon gobernacion deliberadamente y treciendo e estado di drecho den peliger y sin miras pa trece coreccion den esaki. Den e caso aki na ningun momento so e derecho di estado tabata na peliger, paso tabata trata di un disputa di interpretacion y pa kita duda Presidente di parlamento a coregi e situacion door di declara tur mocion nulo.


Otro barbaridad di sr. Booshi Wever

Como ex mandatario ta un berguensa cu sr. Booshi Wever no sa mes y ta pidi gobernador pa disolve parlamento. E derecho pa disolve parlamento ta den man di gobierno y esaki ta posibel si tin un kiebro di confiansa entre gobierno y parlamento cu awo no ta caso. Y sigur ta di lamenta di ta hinca gobernador den politikeria barata di sr. Booshi Wever


Mensahe na sr. Booshi Wever pa stop cu e politikeria barata paso Aruba ta pasando den temponan hopi dificil y na e momentonan aki atencion no ta na sr. Booshi Wever pero nos prioridad ta pone nos pais aki mas pronto cu ta posibel bek riba pia paso hopi mama y tata y famia ta depende di esaki y sigur e politica anticua aki di sr. Booshi Wever no ta yuda e pueblo cu nada.


65 views0 comments