Booshi Wever:

HAMAS POR PERMITI PA RIPITI ENTREGA DI NOS AUTONOMIA MANERA A SOSODE NA 1950



For di basta tempo caba nos por a sinti e afan di politiconan Hulandes pa pone presion riba e.o. Aruba pa bin cu reformanan duradero y structural den e forma cu nos ta goberna nos pais. Hulanda tabata menasa cada bes di bin cu un "aanwijzing", pero ni esaki a spanta nos gobernantenan. A prefera di sigui goberna sin cumpli cu un maneho financiero responsabel ni tampoco cumpli cu palabracionnan haci cu gobierno di Reino. COVID-19 sinembargo a trece un fin na e pasenshi y indulgencia hulandes. Hulanda no ta acepta mas posponemento di introduccion di reformanan y a bin cu demandanan estricto di un forma dictatorial. Pregunta ta si nos lo doblega of nos lo keda riba pia cu nos bandera na man manera Betico Croes dfm a duna nos di conoce.


Betico Croes dfm a compronde e sentimento Arubano pa ta baas den nos mesun cas y a laga hasta hancra den e himno di su partido MEP cu nunca mas por permiti pa nos cay den e cadena di esclavitud manera a sosode na aña 1950. Na 1950 politiconan di Aruba a acepta pa cambia representacion den e parlamento Antiano di 8-8 pa 12-8. E acto di traicion aki a garantisa un dominio total di Corsou cu siguientemente a impone su posicion dominante. E lucha cu a sigui mas bien tabata pa Aruba ser salba di e cadena di 12-8. E pueblo a responde na e yamado di e lider indiscutibel Betico Croes, a lanta riba y a uni, loke a resulta na 1986 cu Aruba a logra kibra e cadena y sclama na bos halto "LIBERTAD"!


Awor despues di 34 aña ta mustra cu un biaha mas nos ta core e peliger di cay den un cadena di esclavitud atrobe, pero den e caso aki un esclavitud pio cu loke a sosode na 1950 y atrobe cu aprobacion y colaboracion di nos propio politiconan. Tin un diferencia sinembargo, pasobra na 1950 ainda nos por a conta riba un gobierno insular y representacion den e gobierno central, pero e RAFT y e CHE lo nifica cu nos no lo tin NADA mas di bisa riba nos isla. Nos lo wordo degrada na ta simpelmente "Mirones", sin ningun tipo di derecho pa habri nos boca y para pa e derechonan di nos poblacion. Bou di ningun circumstancia esaki por ser acepta, pero elo rekeri un esfuerso nacional pa nos percura cu nos autonomia ta ser conserva y cu nos estado di derecho ta wordo respeta. Di otro banda nos HUNTO mester para pa nos haya un gobernacion basa riba principionan di Good Governance y un democracia bibo. Pues e epoca di goberna cu e mannan los ta tras di lomba y esaki ta conta pa delaster un sector den nos sosiedad.


Den e acuerdo cu a yega den e comunidad Europeo e principionan aki a ser logra. Europa lo yuda nan rumannan di Sur-Europa bou di condicionnan estricto, pero e paisnan ta mantene nan autonomia y tur hende ta respeta nan Estado di Derecho. Nan a acorda cu prome cu haya e siguiente tranche e progreso den e REFORMANAN lo ser evalua PROME cu duna luz berde pa e paisnan haya e placa. Dicon no por aplica esaki pa Aruba tambe? Un "win-win situation". Aruba lo por conta cu e ayudo financiero y di otro banda Hulanda por ta garantisa cu e reformanan cu definitivamente ta NECESARIO ta ser introduci.


Apesar cu e posicion hulandes, segun sr. Knops, ta keda intransigente loke parce ta duna poco espacio pa delibera, toch UPP ta convenci cu lo por logra resultado si nos duna prueba di por restablece CONFIANSA di Hulanda y nos pueblo door di nombra un gobierno di transicion. Un "zakenkabinet" cu tareanan specifico pa introduci reglanan estricto di Good Governance. Un gobierno cu cu lo mara mannan di e politico y cu no ta mara na e resultado di e siguiente eleccion ni mester tene cuenta cu interesnan di sponsornan di partido y cu no tin problema pa implementa reformanan impopular pero hopi necesario y indespensabel pa por garantisa un desaroyo positivo pa Aruba y su pueblo.

Asina lo tin Normal Nobo pa e mundo politico cu lo conduci cu e Pueblo lo haya un NORMAL MIHÓ!!


Partido UPP

Booshi Wever

21 di juli 2020


10 views0 comments