Bo educacion, bo unico opcion!



Aruba, mi pueblo, nos ta na un cruzada caminda nos escogencia dia 25 di juni proximo lo determina e rumbo cu nos ta haya cu nos y nos pais merece.


E ultimo aña aki sigur a revela nos potencial maximo den adapta, reahusta y reinventa nos mes usando cada recurso di nos balor humano den un realidad nobo. Un realidad nobo cu sigur ta conoce su retonan pero tambe ta trece oportunidadnan di crecemento personal pa nos cada un y nos dushi isla.


Pa por haci uzo maximo di e oportunidadnan aki, nos cada un mester e plataforma y espacio necesario pa nos ekipa nos mes cu habilidad y conocimento nobo y asina duna honor na e creatividad y talentonan cu nos cada un a wordo bendiciona cune. E diseño personal di bo futuro merece di wordo carga cu e seriedad necesario pa expande bo horizonte y oportunidadnan pa asina crea un bida digno di bo potencial. Bo educacion ta un parti primordial di bo bida. E ta simbolisa e comienso di cada meta, e motor di cada logro y e derecho cu bo ta duna bo mes tur dia pa cuminsa di nobo.


Nos educacion y e bon uzo di nos talento no tin edad, mescos cu potencial di nos cada un no tin un comienso ni fin. Pa por crea un futuro y crecemento economico sostenibel, fortifica nos norma y balornan, engrandece nos cultura y crea base pa innovacion y invencion, nos fundeshi cu ta nos capital humano mester ta solido y resiliente. E solides y resiliencia aki nos ta logra ora cu hunto nos ta anticipa, analisa, evalua y resolve cada reto nos dilanti y ta tuma e curashi pa re-diseña nos presente y futuro cuminsando na nos mes y aportando colectivamente na bienestar general riba nos isla. Cu vision riba desaroyo personal y colectivo nos lo aporta na fortalece nos isla y prepara nos mes pa cualkier reto nos dilanti.


Bo confiansa den mi persona, ta un paso tuma pa re-diseña y reconstrui bo futuro y e futuro cu nos tur merece. E ta bo oportunidad pa laga bo bos resona, bo bienestar wordo amplia y defendi, bo oportunidadnan realmente wordo crea y brinda. Bo sosten ta nifica bo aporte na un desaroyo sostenibel caminda cada ser humano den tur su facetanan, nos cultura, nos medio ambiente y nos derechonan ta wordo respeta y representa.


Aruba, mi pueblo, diabierna awor ban crusa e crusada hunto y scoge pa hunto diseña, vocifera y lidera den nos presente y e futuro nos dilanti.

Di curazon, danki pa bo confiansa y sosten.

Bo humilde sirbidor, Gerlien Croes.