Bautismo emocionante di Crash Test Dummies Cycling Club su uniform.


Diasabra 28 November 2020, na Cancha Sally Petra Mahuma, Crash Test Dummies Cycling Club a batisa nan uniforma den presencia di e hobennan y muchanan di Marc Generation Airsoft Team.


Un atardi yena cu emocion na momento cu tur miembro ciclista a yega den nan uniform nobo cu e logo di Marc Generation Airsoft Team. Despues di algun palabra di e presidente di Marc Generation Airsoft Team, Crash Test Dummies Cycling Club a batisa nan uniform den un forma diferente y a haci entrega di un donacion sorpresa na e organisacion.



Crash Test Dummies Cycling Club ta un grupo di amigo ciclista cu a uni hunto pa un bon causa. Na aña 2014 Crash Test Dummies Cycling Club a wordo funda cu e meta di yuda promove instancianan social den nos comunidad door di representa nan den e deporte di ciclismo. Den pasado Crash Test Dummies Cycling Club a representa Fundacion Autismo, Fundacion Contra Cancer di Prostaat y awor por bisa cu nan tin e honor di por representa y carga e logo di e organisacion Marc Generation Airsoft Team.


Marc Generation Airsoft Team ta un organisacion non-profit cu a wordo funda na aña 2010. Desde aña 2015 e organisacion ta brinda hobennan y muchanan e oportunidad di practica gratis e deporte di Airsoft. Pa medio di e deporte e organisacion ta logra e meta di guia y motiva hobennan pa ta activo den un forma positivo. Cu hopi amor y dedicacion un grupo di lidernan voluntario ta participa tur diasabra y diadomingo den e trainingnan pa yuda stimula disciplina y alavez yuda inspira e hobenan pa logra nan metanan den bida. Awendia e organisacion ta conta cu 40 mucha y hoben miembro, pero e interes pa practica e deporte di Airsoft ta birando mas grandi entre e hobennan y muchanan den nos comunidad. Si abo mucha of hoben kier sa mas di Airsoft of kier practica e deporte tuma contact cu Marc Generation Airsoft Team via nan facebookpage; https://www.facebook.com/mgat.aruba



Crash Test Dummies Cycling Club kier duna un danki special na tur su miembronan cu a uni y contribui pa sorpresa tur hoben y mucha di Marc Generation Airsoft Team.

Crash Test Dummies Cycling Club ta contento di por contribui na yuda cumpra mas material pa asina mas hoben y mucha por sigui practica e deporte di Airsoft.


6 views0 comments