Awo ta enseñansa su ora!



Falta algun dia pa eleccion y mas cu nunca e rumbo y futuro di enseñansa ta den man di cuerpo di docentenan. Cada un docente tin den nan man si nan kier cuminsa un era nobo den enseñansa unda cu prioridad lo ta pa trece trankilidad y paz, unda cambionan ta bin a base di dialogo y uso di conocemento di nos yiunan di tera. Of ta existi e posibilidad pa escoge un biaha mas pa intrankilidad y sigur hopi dictadura den enseñansa .


3 aña y 7 luna di instabilidad den enseñansa

Enseñansa mester stabilidad cu a bay perdi. Esaki ta di vital importancia si kier trece cambionan na bienestar di nos muchanan. Nos a conoce un Minister di Enseñansa cu no por a dialoga y convence niun hende di su cambionan proponi. Motibonan cu no por a convence niun hende ta paso cu niun plan e tabatin bon prepara y mas pio ta cu nunca e no kier a haci uzo di conocemento di nos mesun yiunan di tera cu por a yuda den e proceso y sigur cu e cambionan lo por a bira realisabel. Pero lo mas repugnante tabata su manera di persigui tur hende cu no ta di acuerdo cune y sigur a bira un Minister hopi rencoroso contra e cuerpo di docente y sigur su persona nunca a sa di balora nos propio yui di tera.

Pesey p’ami persona ta di vital importancia pa trece e trankilidad y paz cu a bay perdi den enseñansa pa hunto cu e veld y na un manera bon prepara y structura y cu uso di conocemento di nos mesun yiunan di tera, lo percura pa trece cambionan cu lo eleva nos nivel di enseñansa hopi liher. Pero lo mas importante ta cu lo percura pa crea un Plataforma di dialogo y unda tur cambio lo bai na manera transparente y unda cu niun hende mester tin miedo di expresa nan mes.


E decision ken lo bira e representante den enseñansa ta den man di cada docente

Awo ta ora di enseñansa y esaki ta den man di e cuerpo grandi di docente, cu tin e oportunidad den nan man pa escoge nan representante. Despues di locual a pasa mi ta pidi cada docente pa reflecciona unda nan kier wak enseñansa y sigur pa nan haci un bon escogencia cu lo marca e futuro di enseñansa. Nos no tin tempo pa sigui inventa paso ta e mesun motibo di inventa a causa hopi daño e ultimo 3 aña y 7 luna ora hopi a sostene algo diferente pero cu na final a resulta di ta desastroso pa nan mes y pa enseñansa.


Partido MEP y mi persona Edgard Vrolijk ta cla pa brinda enseñansa e trankilidad tan anhela, unda cu nos lo evalua tur decision tuma e ultimo añanan y unda cu lo para tur decicion cu a crea conmocion den enseñansa. Nos prioridad ta pa eleva e nivel di enseñansa y nos a demostra esaki caba cu e Proyecto di E-learning unda cu maske nos no tin como MEP e cartera di enseñansa nos a purba haci lo maximo posibel na bienestar di nos muchanan y sigur mi persona a sa di para hunto cu e cuerpo di docente unda a para hopi locura cu e Minister demisionario kier a tuma cu lo por tabata mas devastador ainda pa enseñansa. Pesey mi persona ta manda e siguiente mensahe: AWO TA ENSEÑANSA SU ORA!