Awe 12 di october MEP ta recorda 23 aña di fayecimento di ing. Roland Lacle


Awe 12 di october partido MEP ta recorda e di 23 aña di fayecimento di un gran patriota ing. Roland Lacle (dfm).


Roland a nace dia 17 di october 1939 y a dedica un gran parti di su bida den politica sirbiendo su pueblo y su partido den diferente funcion.

Na aña 1971, esta na momento cu Betico Croes a dicidi di funda su propio partido, Roland Lacle tabata un di e promenan cu a uni su mes cu Betico y asina a bira co-fundador di MEP, un partido cu el a stima te na su morto. Roland tabata un di e pilarnan cu a lucha schouder cu schouder cu nos libertador pa e logro di Status Aparte.


Como politico Roland tabatin un trayectorio impresionante y a ocupa practicamente tur funcion ehecutivo y legislativo den Antias y Aruba. E tabata miembro di Eilandsraad di Aruba, miembro di Staten di Antias, diputado di Aruba, Ministro Plenipotenciario interino pa Antias y alavez representante di Antias Hulandes den Mercado Comun Europeo y Ministro di Trafico y Comunicacion di Antias. Pa pais Aruba e tabata miembro di Parlamento, Ministro Plenipotenciario na Hulanda y Ministro di Finanzas. No tin ningun otro politico den Antias y Aruba cu a yega di ocupa tur e funcionnan importante aki.


Dia 12 di october 1997 Roland a fayece despues cu el a keda hopi aña sufriendo di un quebrante di salud. Como reconocemento na e gran Arubiano aki, Gabinete Oduber na 2003 a duna e caretera principal dilanti di Hospital bieu y sigui te su cas na Paradera e nomber di “Caya Ing. Roland Lacle” y p’asina tene su memoria bibo den nos comunidad. Roland su lucha, dedicacion y fieldad na nos partido lo keda semper graba den nos curason. Cu Roland sigui sosega na paz den Reino di Señor.



28 views0 comments