Awe 11 di juli ta recorda e di seis aña di traicion di nos autonomia!

“Mike Eman y AVP tabata e autornan principal di entrega di nos autonomia financiero na Hulanda”



Awe 11 di juli nos ta recorda cu 6 aña pasa Conseho di Ministro di Reino durante un reunion na Den Haag a dicidi pa laga ex-Gobernador Refunjol no firma e presupuesto 2014 di pais Aruba, mientras cu no a haci un investigacion di e presupuesto aki manera palabra entre Hulanda y Aruba. Cu e no firmamento aki Aruba oficialmente a haya un Aanwijzing di Conseho di Ministro di Reino.


Henter e entregamento di nos autonomia financiero a origina ora cu Gabinete Mike Eman a haci un desaster cu nos finansa publico caminda durante añanan largo nan a crea deficitnan financiero astronomico di mas cu 400 miyon florin pa aña y consecuencia di esaki tabata un redoblacion di nos debe nacional yegando te na mas cu 82% di nos GDP na 2014.

Incumplimento cu varios norma financiero

Hecho ta cu durante e transcurso di aña 2012 en adelante e Gobierno di Mike Eman no a cumpli cu ningun di e palabracionnan haci cu Hulanda pa trece e finansa di pais Aruba den un rumbo sostenibel:

1. NO a cumpli cu e norma di 1350 miyon florin di gastonan di gobierno

2. NO a cumpli cu e reduccion di deficit di 75 miyon florin tur aña

3. NO a cumpli e norma di -3.7% di deficit

4. NO a cumpli cu reduccion di e debe nacional, pero a aumenta esaki te na 4 biyon florin.


Tur esaki tabata e motibo cu Hulanda a conclui cu Gabinete Mike Eman no ta serio ya cu e tabata maneha e finansas publico den un forma iresponsabel y cual al final lo a conduci na bancarota di nos pais.


Pues e resultado tabata cu e gobierno di AVP a haya un Aanwijzing y un KB firma pa nos Rey Willem Alexander dia 11 di juli 2014 y cual finalmente a desemboca den institucion di un Comision Supervision Financiero, esta CAFT pa Aruba. Si esaki no ta entrega di nos autoomia financiero, ta con otro lo por a yama esaki anto?


Welga di hamber

E implementacion di e KB y Aanwijzing a conduci cu ex Prome Minister Mike Eman a bay bao palo di kwihi den un supuesto welga di hamber bebiendo Ensure durante 6 dia largo, caminda el a acusa y insulta e Hulandesnan como ‘verkrachters’ y asina a pone cara di henter nos pais na berguensa internacionalmente. No mester lubida tambe con den e dianan ey e activistanan di AVP a perde tur respet pa nos Gobernador cu insultonan baho y tambe tirando tur clase di obheto riba auto di nos Gobernador ora cu e tabata sali for di su oficina.


Finalmente Gabinete Mike Eman a haya su mes obliga di baha cabes y adapta e presupuesto 2014 y pa despues - pa complace e mesun verkrachtersnan aki - entrega nos autonomia financiero den man di Hulanda y CAFT riba e anochi di traicion di 27 augustus 2015.

Cu esaki tambe Gabinete Eman a percura pa skirbi un pagina scur den historia di nos pais.




45 views0 comments