Awa yobe...maishi a crece: Minister di bishita na Cunucu di Jani Tan


Si tin un grupo cu ta contento cu tanto awasero e fin di siman aki, ta e cunukeronan. Minister drs. Marisol Lopez-Tromp a bishita Cunucu Jani Tan na Hooiberg. Ey el a cera conoci cu riba 10 diferente berdura y fruta cu e polis y alabes cunukero, ta produci den su cura di cas. Di e mas cu 900 ciudadanonan cu a pidi of cu a reconfirma tereno “huurgrond” pa planta, tin cu como 200 den nan cu a pidi pa por planta patras di cas.


Vladimir Feliciana ta un polis di profesion, pero den su tempo liber e ta planta den su cura di cas. E cunucu el a dedic’e na su welo y na su tata, ambos tabata planta y a inspir’e p’e haci mesun cos.


El a splica e mandatario cu e hobby di plantamento ta un trabou di tur dia, no tin diasabra y no tin diadomingo pa e matanan. Tur dia mester muha nan, cuida nan y kita yerba malo cu ta crece memey di e berdura y frutanan.


E cunukero a bira conoci pa Boonchi largo, promenton, promente, yuca, bacoba, tomati y mas. El a sigura cu e lo sigui planta y desaroya su habilidad di plantamento.


Minister Marisol Lopez-Tromp a mustra su satisfaccion pa e desaroyo aki. Ta su maneho pa otorga mas tanto tereno posibel pa cunukeronan por planta. E mandatario kier duna mas ciudadano chens pa por planta.


“Mi ta contento di tende cu den e caso aki, e cunukero ta come tur dia di su mesun cura. Ey nos kier yega”, asina Minister Marisol Lopez-Tromp a termina bisando.


30 views0 comments

Recent Posts

See All