AVP a scucha di profesionalnan den sesion impactante riba siguridad social y oportunidad igual


Siguiente cu e serie di sesion di brainstorm organisa pa Partido di Pueblo Arubano (AVP) diahuebs anochi a reuni cu 8 representante di entidad, organisacion y fundacionnan local cu ta traha den e sector social. E encuentro cu a tuma luga den Renaissance Convention Center a sirbi pa conoce e situacion actual riba isla di Aruba. Specificamente a puntra cada participante pa trece dilanti kico ta e reto y oportunidad, pero tambe pa kico ta nan recomendacionnan pa un recuperacion efectivo.


E delegacion encarga cu e sesion en particular aki ta consisti di lider di AVP mr. Mike Eman, drs. Mervin Wyatt-Ras, mr. drs. Arthur Dowers y mr. Gerlien Croes cu asistencia di drs. Rene Herde y mr. Nicole Hoevertsz. Prome cu e palabranan di apertura for di Eman y Wyatt-Ras, a solicita for di Pastor Jairo Maduro pa haci oración.


E panel a cuminsa cu presentacion di Wilbert Marchena M.A. di Departamento pa Asuntonan Social cu 30 aña di experiencia, kende a duna un bista di e situacion na Aruba pa medio di estadisticanan cu ta indica cu Producto Interno Bruto na nos pais no a crece for di aña 1990. Basa riba esey por papia cu tabatin crecemento economico, pero no un desaroyo economico positivo. Segun Marchena, un posibel acelerador den eliminacion di pobresa ta e sosten na famianan mas vulnerabel.


Siguiente riba e programa tabata Gianaika van der Biezen, director di Fundacion Pa Nos Comunidad. El a papia riba e crecemento exponencial den clientenan, con e fundacion a maneha esaki y kico ta e retonan pa futuro. Actualmente ta den negociacion pa obtene e recursonan necesario pa continua cu e ayudo durante 2021. Hunto cu Cruz Cora, ta yudando un total di riba 12 mil famia riba nos isla.


Monique Giel-Labad, trahando 28 aña na Wit Gele Kruis a enfoca riba e problematica di mamanan hoben y su consecuencianan. Sala a keda asombra ora el a relata di e caso di un mama di apenas 19 aña cu ya caba tin cinco yiu, mescos cu tin hopi caso di tres famia cu ta biba bou di e mesun dak y dependiente di un salario.


Otro di e panelistanan a señala con e fuente mas grandi den comunidad ta e ‘pobresa generacional’ cu ta crea un circulo visioso di condicionnan cu e persona no por saca su mes afo. Tambe a menciona burocracia enorme cu no ta haci e caminda ainda mas dificil pa esnan den necesidad. E grupo aki ta consisti mayormente di hende grandi y mucha cu ta sufri di falta di alimentacion sano, educacion apropia pa un empleo permanente y falta di un base familiar solido cu por guia y duna ehempel. 


Un di e conclusionnan di e anochi ta cu e pandemia a haci esnan pober un poco mas pober ainda. Pastor Jairo Maduro, como un di e panistanan a elogia e realisacion di e anochi pasobra manera el a bisa: “Un hende cu ta Minister of Parlamentario no sa tur cos, pero e por yuda si; dor di scucha y promove e conocemento di esnan den e veld.” E anochi a clausura cu un dialogo caminda delegacion por haci pregunta na e panalistanan y bin cu ideanan dilanti pa haya nan opinion y sugerencianan. Na final mr. Mike Eman a gradici tur orado pa nan gran aporte na e proceso pa por yega na un vision pa futuro.


38 views0 comments

Recent Posts

See All