AVB ta sigui ehecuta plan di Grow Football Diesocho coach participante den curso di B-License



ORANJESTAD, Aruba - 30 di april 2021: ArubaanseVoetbal Bond a organisa curso di BLicense. Pa por a realisa esaki, AVB mester a traha cu cooperacion di Concacaf y di KNVB.

Presidente di federacion, ing. Richard Dijkhoff, ta super contento cu por fin a logra cuminsa cu e curso di B-License. Pa por a realisa e curso aki, esaki tabata un proceso largo pa por cumpli cu tur e exigencianan di CONCACAF. Por ehempel, AVB mester a conta cu e sosten di KNVB pa trece docentenan cu ta cumpli cu e exigencianan di Concacaf pa por duna e curso aki.

Loke e federacion ta haci, ta brinda oportunidad n'e coachnan di Aruba pa nan sigui desaroya nan mes, mehora y amplia nan conocemento pa asina nan por entrena nan ekipo miho ainda. Mas conocemento e coachnan tin, miho entrenamento nan lo ta. Miho e hungadonan wordo entrena, miho e hungadonan lo ta prepara pa enfrenta otro ekiponan y esaki lo mester percura pa tin un miho Campeonato. Pa e motibo aki ta hopi importante pa AVB a logra pa organisa e curso aki caminda cu 18 coach lo participa. Entre e cursistanan aki tin varios coachdi e diferente clubnan di Division Honor y di Division Uno.

Den historia di e federacion, esaki ta prome biaha cu ta organisa un curso di e nivel aki na Aruba. Esaki ta algo cu nos mes ta organisando y tur ta cay den cuadro di e proyecto Grow Football. Esaki ta un di e tantisimo proyecto cu AVB ta ehecutando y/of ta bay ehecuta, asina ing. Dijkhoff a expresa.

Esaki ta un momento di satisfaccion, pa motibo cu por mira e resultado di tur trabou duro haci den e ultimo lunanan. Na momento di papia cu coachnan, a indica na nos di ta contento di e oportunidadnan ricibi pa desaroya nan mes. E grupo aki ta consisti di diesocho cu ta bay pa nan B-License y varios di nan ta coachnan conoci na Aruba.

E intencion ta pa crea un pool (grupo) cu diesocho coach ariba e nivel B di Concacaf pa asina e clubnan tin escogencia entre coachnan certifica riba nivel pa yuda cu nan desaroyo. Tur esaki ta un momento historico pa AVB, unda cu porfin por mira di ta logra e B-License. Un pabien na henter comunidad di futbol, na club y Aruba, pasobra esaki ta algo cu AVB ta haciendo y lo sigui cu nan den e periodonan cu ta bin. Esaki ta locual AVB ta haciendo pa conhuntamente cu su clubnan miembro traha na bienestar di futbol na Aruba cu e meta pa mehora futbol.

7 views0 comments