Asociacion Scouting Aruba ta sostene y comparti e sentimentonan den comunidad di Aruba

Asociacion Scouting Aruba ta sostene y comparti e sentimentonan den comunidad di Aruba relaciona cu casonan di abuso di mucha riba diferente plano

Scouting como organisacion hubenil na Aruba tin un trayectoria di mas di 90 aña sirbiendo e comunidad Arubano pa medio di gruponan den practicamente tur districto. Scouting Aruba a nace 20 aña pasa despues cu e gruponan individual a dicidi pa uni bou di un solo maneho centralisa y plataforma pa intercambio y calidad. Na aña 2017 Scouting Aruba, cumpliendo cu tur exigencianan, a bira miembro formal di e Organisacion Scout Mundial (WOSM) caminda mas di 170 pais ta miembro y tin participacion den e maneho di e movemento scout mundial.

Mundialmente y aki na Aruba sigur, Scouting ta den desaroyo continuo como movemento cu enfoke riba educacion conforme reglanan y procedura di nos organisacion madre, caminda nos ta crea ambiente sigur (safe) pa nos muchanan y hobennan ta protehi durante actividadnan scout. Na nivel mundial WOSM a presenta tur su organisacionnan nacional e programa cu yama “Safe from Harm”, cual ta wordo implementa y re-evalua continuamente door di e diferente gruponan scout afilia na Scouting Aruba.

E programa aki ta ekipa nos lidernan cu e conocemento adecuado pa por reconoce y atende cu señalnan di abuso o peliger (riesgo) bou di mucha y hobennan. Nos ta referi aki na abuso o peliger den tur forma, sea sexual, fisico, negligencia, bullying, descriminacion, mal nutricion, exploitacion etc. Tambe pa por planea medidanan di seguridad den tur nos encuentronan regular, campamento, eventonan den naturalesa, riba lama y international.

Como organisacion responsabel directiva actual sinta desde aña 2019 a intensiva e maneho cu cada lider, miembro (mucha y hoben) y/o mayor cu experencia o constata señal di abuso den cualkier forma manera ariba menciona mester raporta esaki inmediatamente y directamente na e autoridadnan competente di Cuerpo Policial di Aruba cual ta departamento di Jeugd en Zeden Politie. Tambe pa notifica directiva di Scouting Aruba asina cu e keho ta entrega. Na momento cu Scouting Aruba wordo acerca siguramente nos lo duna tur cooperacion na autoridadnan competente pa atende cu cualkier caso y alavez lo nos mustra nos pleno sosten y convivencia na cualkier victima di posibel abuso.

Internamente mas cu claro tambe directiva tin su maneho pa atende cu miembrecia di e lider envolvi caminda despues di brinda e derecho fundamental di wordo scucha, e proceso di suspencion pendiente investigacion hudicial y terminacion di miembrecia di acuerdo cu nos reglamento interno lo tuma lugar si resulta cu tin prueba o indicacionnan palpabel cu algo fuera di luga o criminal a tuma lugar.

Scouting Aruba ta reitera su compromiso pa crea ambiente sigur pa tur participante y lider. Asina pa medio di e programa scout por sigui educa hubentud di Aruba pa bira ciudadanonan ehemplar y responsabel pa nos comunidad y finalmente prepara nan pa bira nos futuro lidernan. Comunidad y specialmente mayornan por tin e confiansa cu Scouting Aruba ta practica loke e ta bisa y sigur lo actua na momento cu cualkier caso bini na nos conocemento. Proteccion di nos miembronan ta nos prome prioridad.


3 views0 comments